विधी शाखेच्या चौथ्या सत्राची परीक्षा १२ जूनपासून

मुंबई: एटीकेटी व नियमित परीक्षेच्या तारखा समांतर असल्यामुळे आणि विद्यार्थ्यांना अभ्यासासाठी पुरेसा वेळ नसल्यामुळे विधी शाखेची (तीन वर्षीय अभ्यासक्रम) ६ जूनपासून सुरू होणारी चौथ्या सत्राची परीक्षा पुढे ढकलण्याचा निर्णय मुंबई विद्यापीठाने घेतला होता. आता सदर परीक्षा १२ ते २० जून २०२३ या कालावधीत पार पडणार आहे. ही परीक्षा पुढे ढकलण्यासाठी विद्यार्थ्यांसह शिंदे गटाच्या युवा सेनेने मागणी केली होती.

या परीक्षेचे सुधारित सविस्तर वेळापत्रक मुंबई विद्यापीठाच्या संकेतस्थळावर उपलब्ध आहे. सकाळी १०.३० ते दुपारी १२.३० या वेळेत परीक्षा होणार आहे. विद्यार्थ्यांना २० मिनिटे आधी परीक्षा केंद्रावर हजर राहणे बंधनकारक असेल. याचसोबत मोबाइल फोन, डिजिटल घड्याळ व उपकरणे परीक्षा केंद्रावर आणता येणार नाहीत.