‘लोकसत्ता’कडून वैविध्यसज्ज ‘अर्थ’वेध!

मुंबई : दोन वर्षांतील पहिलाच पूर्ण वर्षासाठीचा केंद्रीय अर्थसंकल्प निर्मला सीतारामन यंदा १ फेब्रुवारी रोजी सादर करतील. प्राप्तिकर स्तररचनेत बदल होऊन खिशात अधिक पैसा खुळखुळणार का.. पायाभूत सुविधा, कृषी, शिक्षण, आरोग्य, आवास या क्षेत्रांमध्ये काय तरतुदी असतील.. महिला, शेतकरी यांच्या वाट्याला काय असे अनेक मुद्दे असतात. अर्थसंकल्पाद्वारे त्यांचा धांडोळा वैविध्यपूर्ण आणि वैशिष्ट्यपूर्ण पद्धतीने घेण्याची परंपरा ‘लोकसत्ता’तर्फे यंदाही जपली जाईल. देशाच्या दृष्टीने अत्यंत महत्त्वाच्या असलेल्या पण सर्वसामान्यांसाठी वरकरणी अगम्य वाटणाऱ्या अर्थसंकल्पीय आकडेपटाचे अंकसंज्ञारूपी बोजडपण दूर करण्यासाठी नित्याप्रमाणे भरपूर पानांसह एका खास संकल्पनेचे सादरीकरणही असेल.