मुंबई : नाटक, मालिका आणि चित्रपट क्षेत्रात उल्लेखनीय कार्य करणाऱ्यांना दरवर्षी अर्चना नेवरेकर फाऊंडेशन या संस्थेच्या वतीने ‘कलादर्पण’ पुरस्काराने सन्मानित करण्यात येते. यंदा ज्येष्ठ अभिनेत्री सुषमा शिरोमणी यांना जीवनगौरव पुरस्काराने सन्मानित करण्यात येणार आहे. ‘लोकसत्ता’चे ज्येष्ठ नाटय़ समीक्षक रवींद्र पाथरे यांना विशेष पत्रकारिता पुरस्काराने सन्मानित करण्यात येणार आहे.
करोनामुळे दोन वर्षे ‘संस्कृती कलादर्पण’ पुरस्कारांमध्ये खंड पडला होता. यंदा ‘कलादर्पण’ या नावाने हा पुरस्कार प्रदान सोहळा सुरू करण्यात येणार असल्याची माहिती संस्थेच्या संस्थापिका अर्चना नेवरेकर यांनी दिली. नाटक, चित्रपट आणि मालिका क्षेत्रात यंदा विविध विभागांसाठीचे पुरस्कार जाहीर करण्यात आले. याशिवाय, काही उल्लेखनीय पुरस्कारांचीही घोषणा करण्यात आली. यात लक्षवेधी चित्रपट म्हणून ‘झिम्मा’, ‘पेन्शन’ चित्रपटातील भूमिकेसाठी लक्षवेधी अभिनेत्री म्हणून सोनाली कुलकर्णी, मराठी ओटीटीसाठी विशेष योगदान पुरस्कार ‘प्लॅनेट मराठी’चे संस्थापक अक्षय बर्दापूरकर यांना पुरस्कार जाहीर करण्यात आले आहेत.
