शीळ-डायघर येथील लकी कंपाऊंडमधील इमारत दुर्घटनेनंतर फरार झालेला इमारतीचा मुख्य ठेकेदार लक्ष्मण राठोड याला ठाणे गुन्हे अन्वेषण शाखेने नुकतीच लातूर येथून अटक केली आहे.
लकी कंपाऊंडमधील सात मजली अनधिकृत इमारत कोसळून ७४ निष्पाप नागरिकांचा मृत्यू झाला होता. या घटनेप्रकरणी ठाणे गुन्हे अन्वेषण शाखेच्या पथकाने बिल्डर, त्याचे भागीदार, महापालिकेचे वरिष्ठ अधिकारी, पोलीस हवालदार, पत्रकार, नगरसेवक आदींना अटक केली होती. त्यापैकी काहींची जामीनावर सुटका झाली आहे. इमारत दुर्घटना घडली, त्यावेळी राठोड तेथे उपस्थित होता. मात्र, या घटनेचा अंदाज येताच त्याने तेथून पळ काढला होता. तो मुळगावी लातूरला पळून गेल्याची माहिती पोलिसांकडे होती. त्यानुसार, पोलिसांनी दोनदा लातूरला जाऊन त्याचा शोध घेतला. मात्र, त्यावेळी तो त्यांच्या हाती लागला नव्हता. दरम्यान, गेल्या आठवडय़ात ठाणे गुन्हे अन्वेषण शाखेच्या पथकाने लातूर येथून त्याला अटक केली आहे, अशी माहिती पोलीस सूत्रांनी दिली.