न्यायालयाच्या निकालानंतर कोकाटेंच्या राजीनाम्याचा निर्णय; मुख्यमंत्री फडणवीस यांची भूमिका

विधान परिषदेत अर्थसंकल्पीय अधिवेशनाच्या पहिल्याच दिवशी विरोधी पक्षनेते अंबादास दानवे यांनी कृषीमंत्री कोकाटे यांच्या राजीनाम्याची मागणी लावून धरली. सभापती राम शिंदे यांनी कोकाटे विधानसभेचे सदस्य आहेत. त्यांच्या बाबतचा निर्णय विधानसभा घेईल, असे जाहीर केले. त्यांच्या उत्तरावर विरोधी पक्षाचे समाधान झाले नाही, विरोधी पक्ष आणखी आक्रमक झाला. सरकारमधील एका मंत्र्याला न्यायालयाने दोन वर्षांच्या तुरुंगवासाची शिक्षा ठोठावण्यात आली आहे. अद्यापही शिक्षेला स्थगिती मिळाली नाही, त्यामुळे कोकाटे यांच्या मंत्रीपदाबाबत सरकारने भूमिका स्पष्ट करण्याची मागणी विरोधकांनी केली. विरोधकांच्या मागणीवरून सत्ताधारी आणि विरोधकांमध्ये आरोप- प्रत्यारोप सुरू झाले.

सभागृहात गोंधळ वाढत असतानाच सभागृहात दाखल झालेल्या मुख्यमंत्री देवेंद्र फडणवीस यांनी गोंधळ थाबवीत, माणिकराव कोकाटे यांच्याबाबतची सुनावणी न्यायालयाने पूर्ण केली आहे, अद्याप अंतिम निकाल दिला नाही. न्यायालयाचा निकाल हाती आल्यानंतर राज्यपाल किंवा सभागृह कोकाटे यांच्या राजीनाम्याबाबत निर्णय घेईल, असे जाहीर केले. त्यानंतर सभागृहाचे कामकाज सुरू होऊन प्रवीण दरेकर यांनी सत्ताधारी पक्षाच्या वतीने राजपालांच्या अभिभाषणाबद्दल आभार प्रस्ताव मांडला. त्यानंतर सभागृहात पुरवणी मागण्या मांडण्यात आल्या.