मुंबई : श्रीमंत संघटना म्हणून ओळखल्या जाणाऱ्या भारतीय क्रिकेट नियामक मंडळावर (बीसीसीआय) राज्य सरकार मेहरबान झाले आहे. क्रिकेट सामन्यांसाठी पुरवाव्या लागणाऱ्या पोलीस बंदोबस्ताच्या शुल्कात सरकारने भरमसाट सवलत दिली आहे.
मुंबईप्रमाणे नवी मुंबई, नागपूर, पुणे या शहरांतील मैदानात क्रिकेटचे सामने आयोजित केले जातात. तेथेही ही सवलत लागू केली असून या बाबत गृह खात्याने आदेश काढला आहे. गृह खात्याने २०१९-२०२० ते २०२३-२४ या कालावधीसाठी क्रिकेट सामन्यासाठी शुल्काचे नवीन दर लागू केले आहेत. यामध्ये सवलत देताना बीसीसीआयवर सवलतीचा वर्षांव केला आहे. मुंबई शहरातील मैदानावर सामने असतील तर बंदोबस्तासाठी टी-२० च्या एका सामन्यासाठी यापूर्वी ७० लाख इतके बंदोबस्त शुल्क आकारले जात होते.
आता ते कमी केल्यामुळे मुंबई पोलिसांना एका सामन्यासाठी केवळ १० लाख रुपये मिळणार आहेत. केवळ एका सामन्यात ६० लाख रुपये इतक्या रकमेवर मुंबई पोलिसांना यापुढे पाणी सोडावे लागणार आहे. एकदिवसीय आंतरराष्ट्रीय सामन्यासाठी ७५ लाख रुपये इतके बंदोबस्तासाठी मिळत होते. या निर्णयाने यापुढे २५ लाख रुपये इतके शुल्क मुंबई पोलिसांना मिळणार आहे. तर पाच दिवसांच्या एका कसोटी सामन्यासाठी यापूर्वी ६० लाख रुपये शुल्क होते ते आता २५ लाख रुपये इतके कमी केले आहे. मुंबईप्रमाणे नागपूर, पुणे, नवी मुंबई येथील मैदानावर क्रिकेटचे सामने आयोजित केले जातात. ‘बीसीसीआय’च्या सचिवपदी केंद्रीय गृहमंत्री अमित शाह यांचे पुत्र जय शाह तर खजिनदारपदी आशीष शेलार आहेत. मुंबई क्रिकेट संघटनेचे अध्यक्ष काळे हेसुद्धा भाजपशी संबंधित आहेत.
