महाराष्ट्र तीन वर्षांत ४६५ मेगावॉटचे सौरऊर्जा प्रकल्प उभारणार

राज्यातील विजेच्या उपलब्धतेत भर घालण्यासाठी अपारंपरिक स्रोतांपासून होणाऱ्या वीजनिर्मितीत वाढ करण्यासाठी येत्या तीन वर्षांत ४६५ मेगावॉट क्षमतेचे सौरऊर्जा प्रकल्प उभारण्याचा निर्णय ‘महानिर्मिती’ने घेतला आहे.
राज्यात सध्या चंद्रपूर येथे एक मेगावॉटचा आणि दुसरा चार मेगावॉटचा सौरऊर्जा प्रकल्प कार्यरत आहे. तर साक्रीजवळ शिवाजीनगर येथे १५० मेगावॉटच्या सौरऊर्जा प्रकल्पाचे काम सुरू आहे. हा सौरऊर्जा प्रकल्प मार्च २०१३ पर्यंत सुरू करण्याचे ‘महानिर्मिती’चे नियोजन आहे. इंधनाच्या प्रश्नामुळे अडचणीत येत असलेल्या ‘महानिर्मिती’ने मुबलक आणि मोफत उपलब्ध असलेल्या सूर्य प्रकाशापासून वीजनिर्मिती करण्यासाठी शक्य तितके प्रकल्प उभारण्याची तयारी चालवली आहे.
सौरऊर्जा प्रकल्पांचे प्रमाण वाढवण्याच्या दृष्टीकोनातून येत्या तीन वर्षांत एकूण ४६५ मेगावॉट क्षमतेचे पाच प्रकल्प उभारण्याचे नियोजन केले आहे. त्यासाठी जागा मिळवण्याचे कामही सुरू झाले आहे. विदर्भ, मराठवाडा, पश्चिम महाराष्ट्र अशा राज्याच्या कानाकोपऱ्यात हे सौरऊर्जा प्रकल्प उभे राहतील.
या नियोजनानुसार उस्मानाबादमधील कुडगाव येथे पहिल्या टप्प्यात १०० मेगावॉटचा तर परभणीतील गंगाखेड येथे २५ मेगावॉटचा सौरऊर्जा प्रकल्प उभा राहणार आहे. त्यासाठी जागा संपादन करण्याचे काम अंतिम टप्प्यात आहे. हे दोन्ही प्रकल्प मार्च २०१४ पर्यंत पूर्ण करण्याची योजना आहे. तर कुडगाव येथेच दुसऱ्या टप्प्यात तब्बल २५० मेगावॉटचा सौरऊर्जा प्रकल्प उभारण्यात येणार आहे. जागेची पाहणी झाली असून भूसंपादनाची प्रक्रिया प्राथमिक टप्प्यात आहे.
 विदर्भातील बल्लारशहा येथे ४० मेगावॉटचा सौरऊर्जा प्रकल्प उभारण्यात येणार आहे. त्यासाठीची जागा ‘महापारेषण’च्या ताब्यात असल्याने भूसंपादनात वेळ जाणार नाही. हे दोन्ही प्रकल्प मार्च २०१५ पर्यंत पूर्ण करण्याचे ‘महानिर्मिती’चे उद्दिष्ट आहे.
याचबरोबर उपमुख्यमंत्री व ऊर्जामंत्री अजित पवार यांच्या बारामतीमध्येही सौरऊर्जा प्रकल्प उभारण्यात येणार असून तो ५० मेगावॉटचा असेल. मार्च २०१६ पर्यंत हा प्रकल्प उभारण्याचे लक्ष्य ठेवण्यात आले आहेत. इतर राज्ये सौरऊर्जा प्रकल्पांबाबत पुढे जात असताना महाराष्ट्र काहीसा मागे राहिला होता. सध्या ‘महानिर्मिती’कडे पाच मेगावॉटचे सौरऊर्जा प्रकल्प आहेत. शिवाजीनगरच्या काम सुरू असलेल्या सौरऊर्जा प्रकल्पसह या साऱ्या आगामी प्रकल्पांमुळे ‘महानिर्मिती’ची सौरऊर्जा प्रकल्पांची क्षमता तीन वर्षांत ६१५ मेगावॉटने वाढणार आहे.