मुंबई : गेल्या दोन वर्षांपासून प्रशासक असलेल्या महाराष्ट्र वैद्याकीय परिषदेची नुकतीच निवडणूक जाहीर करण्यात आली. मात्र जाहीर केलेल्या निवडणूक वेळापत्रकानुसार उमेदवारी अर्ज घेण्यासाठी परिषदेच्या कार्यालयात जाणाऱ्या डॉक्टरांना रिकामी हाताने माघारी जावे लागत आहे. त्यामुळे निवडणुकीच्या मैदानात उतरणाऱ्या डॉक्टरांकडून निवडणुकीच्या कारभारातील गोंधळाबाबत संताप व्यक्त करण्यात येत आहे.

या बातमीसह सर्व प्रीमियम कंटेंट वाचण्यासाठी साइन-इन करा
Skip
या बातमीसह सर्व प्रीमियम कंटेंट वाचण्यासाठी साइन-इन करा

महाराष्ट्र वैद्याकीय परिषदेचा कारभार गेल्या दोन वर्षांपासून प्रशासकांमार्फत चालविण्यात येत होता. नियमानुसार परिषदेच्या निवडणुका घेणे भाग असल्याने परिषदेकडून १७ जानेवारी रोजी निवडणुका जाहीर करण्यात आल्या. त्यानुसार १८ फेब्रुवारीपर्यंत अर्ज भरण्याची मुदत देण्यात आली आहे. निवडणूक लढविण्यासाठी इच्छुक उमेदवार अर्ज घेण्यासाठी परिषदेच्या चिंचपोकळी येथील कार्यालयात गेल्यावर त्यांना अर्ज उपलब्ध नसल्याचे सांगण्यात येत आहे. परिषदेसाठी निबंधक नसल्याने कोणतेही समाधानकारक उत्तर मिळत नसल्याने त्यांच्यामध्ये संभ्रमाचे वातावरण पसरले आहे.

आणखी वाचा
Also Read

निवडणूक जाहीर होऊन १४ दिवस उलटले तरी अर्ज देण्यात आले नाही. काही उमेदवारांनी याबाबत थेट निवडणूक अधिकाऱ्यांकडे विचारणा केल्यानंतर त्यांना मतदारांची यादी पूर्ण झाल्यानंतरच अर्ज मिळतील असे सांगण्यात येत आहे. यामुळे उमेदवारांमध्ये संतापाचे वातावरण पसरले असून निवडणूक प्रक्रियेमध्ये गोंधळ असल्याची टीका हिलिंग हँड युनिटी पॅनेलचे समन्वयक डॉ. तुषार जगताप यांनी केली आहे.

७० हजार डॉक्टरांना प्रक्रियेतून वगळले

वैद्याकीय परिषदेकडे जवळपास दोन लाखांपेक्षा जास्त डॉक्टर नोंदणीकृत आहेत. मात्र यापैकी जवळपास ७० हजार डॉक्टरांनी त्यांच्या नोंदणीचे नूतनीकरण न केल्याने त्यांना मतदार प्रक्रियेतून वगळण्यात आले आहे.

महाराष्ट्र वैद्याकीय परिषदेच्या निबंधकाची नियुक्ती करण्यात आली आहे. सोमवारपासून ते कर्तव्यावर रूजू होतील. नवीन मतदार यादीनुसार उमेदवारांना अर्ज दिले जाणार आहेत. जेणेकरून त्यांचा अर्ज बाद होणार नाही. अंतिम मतदार यादी जाहीर केल्यानंतर ६ फेब्रुवारीपासून उमेदवारांना अर्ज मिळण्यास सुरुवात होईल. तसेच निवडणुकीदरम्यान उमेदवारांना येणाऱ्या अडचणी दूर करण्यासाठी काही व्यक्तींची नियुक्ती करण्यात येणार आहे. – शिल्पा परब, निवडणूक अधिकारी