निलंबित आमदारांना पकडण्यासाठी बेकायदेशीरपणे विधानभवनात घुसखोरी केलेल्या दोन पोलीस अधिकाऱ्यांना निलंबित करण्याच्या मागणीसाठी गुरुवारी एकत्र आलेल्या सर्वपक्षीय सदस्यांनी पाच आमदारांचे निलंबन मागे घेण्याच्या मागणीसाठी शुक्रवारी दुसऱ्या दिवशीही विधिमंडळाच्या दोन्ही सभागृहांत कामकाज रोखले. या आमदारांचे निलंबन मागे घेतले जात नाही तोवर अपमान सोसत कामकाज करणार नाही, असा इशाराही आमदारांनी सरकारला दिला.
पोलीस निरीक्षक सचिन सूर्यवंशी यांना मारहाण केल्याप्रकरणी पाच आमदारांच्या निलंबनाची घोषणा होताच लगेचच त्यांना अटक करण्यासाठी पोलिसांनी विधान भवनाच्या आवारातच सापळा लावला. या आमदारांवर पाळत ठेवण्यासाठी बेकायदेशीरपणे विधान भवनातही घुसलेल्या दोन पोलीस अधिकाऱ्यांवरही कारवाई करावी, अशी मागणी कालपासूनच सत्ताधारी आणि विरोधी पक्षाच्या सदस्यांनी लावून धरली होती. विधानसभेत शुक्रवारी कामकाजाला सुरुवात होताच त्या अधिकाऱ्यांच्या निलंबनाच्या मागणीसाठी दोन्ही बाजूंचे सदस्य आक्रमक झाले. दोषी अधिकाऱ्यांना निलंबित करा व आमदारांचे निलंबन मागे घ्या, त्याशिवाय कामकाज करणार नाही, असे भाजपचे गिरीश बापट यांनी ठासून सांगितले. त्यास संपूर्ण सभागृहाने पाठिंबा दिला. गोंधळ वाढल्याने दोन वेळा व नंतर दिवसभरासाठी कामकाज तहकूब करण्यात आले.
विधान परिषदेत प्रश्नोत्तराचा तास सुरू असतानाच राष्ट्रवादी काँग्रेसचे हेमंत टकले यांनी हाच मुद्दा उपस्थित केला. आमदार ठाकूर यांच्याशी गैरवर्तन करणाऱ्या त्या पोलीस अधिकाऱ्यावर काय कारवाई झाली, याबद्दल सरकारने खुलासा करावा, तोपर्यंत सभागृहाचे कामकाज स्थगित करावे, अशी मागणी त्यांनी केली. त्याला सभागृहातील सर्वपक्षीय आमदारांनी पाठिंबा दिला. त्यानंतर सभापती शिवाजीराव देशमुख यांनी पहिल्यांदा १५ मिनिटांसाठी कामकाज तहकूब केले. त्या वेळेस आमदारांचे निलंबन रद्द करा, पोलीस अधिकाऱ्यांवर कारवाई झालीच पाहिजे, अशा घोषणा देण्यात आल्या. अखेर गोंधळामुळे विधान परिषदेचे कामकाजही तहकूब करण्यात आले.
पोलिसांना फूटेज मिळणार नाही?
पोलीस अधिकाऱ्याला मारहाण झालेल्या प्रसंगाचे सीसी टीव्ही फूटेज मिळविण्यासाठी गुन्हे अन्वेषण विभागाचे अधिकारी विधानसभा अध्यक्षांकडे आले होते. त्यांनी त्याबाबत अर्जही केला आहे. विधिमंडळातील सर्व चित्रीकरणातून तेवढय़ाच प्रसंगाचे फूटेज काढून घेण्याची तयारी पोलिसांनी दर्शविली. पण, त्याचा पंचनामा करावा लागेल, असा मुद्दा उपस्थित झाला. पोलिसांना विधिमंडळातील प्रसंगाचा पंचनामा करण्याची परवानगी दिल्यास भविष्यात अन्य वेळीही ती द्यावी लागण्याची प्रथा पडेल, अशी भीती व्यक्त करण्यात आली. त्यामुळे पोलिसांना फूटेज न दिले जाण्याची शक्यता आहे.
आणखी एका आमदाराला पोलिसी हिसका !
शिवसेना आमदार रवींद्र वायकर यांना वाहतूक पोलिसाने दंड केला. तेव्हा त्यांच्या वाहनचालकाने वायकर आमदार असल्याचे त्याला सांगितल्यावर ‘आता पाच आमदार निलंबित झाले, आणखी करायचे आहेत का,’ असे उत्तर मिळाल्याचे कळते. आमदार क्षितिज ठाकूर यांच्यावर झालेल्या दंडात्मक कारवाईवरून सारे रामायण घडले. वरिष्ठांचा पाठिंबा असल्याने आता वाहतूक पोलीस लोकप्रतिनिधींच्या विरोधात आक्रमक झाल्याचे चित्र निर्माण झाले आहे. एका पोलीस अधिकाऱ्याने तर विधान भवनाबाहेरच काही कर्मचाऱ्यांसमोर भाषण देऊन वरिष्ठ अधिकारी आपल्या पाठीशी आहेत, बिनधास्त कारवाई करा, असे आमदारांवरील कारवाईनंतर सांगितल्याचे काही आमदारांनी सांगितले.
