तनुश्री दत्ताच्या तक्रारीची महिला आयोगाकडून दखल; नाना पाटेकरांसह चौघांना नोटीस

राज्य महिला आयोगाने नोटीस बजावून नाना पाटेकर यांच्यासह चौघांनाही १० दिवसांत आपले म्हणणे मांडण्याचे आदेश दिले आहेत. दरम्यान, याप्रकरणी पोलिसांनी काय कारवाई केली याचा अहवालही सादर करण्यास सांगण्यात आले आहे. त्याचबरोबर सविस्तर माहितीसाठी तनुश्री दत्ता यांनी आयोगासमोर उपस्थित राहण्याचे निर्देशही देण्यात आले आहेत.

त्याचबरोबर या प्रकरणात सिने अँड टीव्ही आर्टिस्ट असोसिएशनला (सिन्टा) तत्काळ याप्रकरणी तक्रार निवारण समिती (आयसीसी) स्थापन करण्याचे आदेशही राज्य महिला आयोगाने दिले आहेत. तसेच ही यंत्रणा या प्रकरणी काय कारवाई करीत आहे, कारवाईसाठी ती सक्षम आहे की नाही, अशी विचारणाही आयोगाने पोलिसांकडे केली आहे.

दरम्यान, तनुश्रीने आपल्याला न्याय मिळावा या मागणीसह राज्य महिला आयोगात धाव घेतली होती. याची गंभीर दखल आज आयोगाने घेतली. नाना पाटेकर, गणेश आचार्य, निर्माता समीर सिद्दीकी, दिग्दर्शक राकेश सारंग आणि काही मनसे कार्यकर्त्यांची आपला छळ केल्याप्रकरणी चौकशी करण्यात यावी अशी मागणी तीने आपल्या तक्रारीत केली होती.