एक खिडकी कार्यपद्धती
मुंबई : गणेशोत्सव जवळ आला असून गणेशमूर्ती घडविणाऱ्या मूर्तिकारांना मंडप उभारण्यासाठी परवानगी देण्याची प्रक्रिया शुक्रवार, ७ जुलैपासून सुरू करण्यात येणार आहे. पर्यावरणपूरक शाडूच्या मातीपासून लहान-मोठ्या, तसेच पीओपीपासून चार फुटांहून अधिक उंच गणेशमूर्ती घडविणाऱ्या मूर्तिकारांना कार्यशाळांच्या मंडपासाठी, त्याचबरोबर मुख्यमंत्र्यांच्या आदेशानुसार मूर्ती साठवणुकदारांना मंडप परवानगी देण्यासाठी शुक्रवारी सकाळी १ १ वाजल्यापासून एक खिडकी सुविधा सुरू करण्यात येणार आहे. पोलीस, वाहतूक पोलीस व अग्रिशमन दल या सर्व यंत्रणांच्या प्रक्रिया एकाच ठिकाणी होणार आहेत. यंदा साजरा होणाऱ्या गणेशोत्सवासाठी मूर्तिकार व गणेशमूर्ती साठवणूकदारांना मंडप परवानगीसाठी एक हजार रुपये सुरक्षा अनामत रक्कम भरावी लागणार आहे.
हेही वाचा >>> मनसेने ठाकरे गटाला युतीचा प्रस्ताव दिला हे खरं आहे का? आमदार वैभव नाईक म्हणाले…
गणेश मूर्तिकारांना दरवर्षी गणेशमूर्ती कार्यशाळेसाठी महानगरपालिका, वाहतूक पोलीस व अग्निशमन दलाची परवानगी घ्यावी लागते. परवानगी मिळविण्यासाठी मूर्तिकारांना वाहतूक पोलीस, स्थानिक पोलीस ठाणे आणि अग्निशमन दलाकडे स्वतंत्र अर्ज करावा लागत होता. त्यांनी परवानगी दिल्यानंतरच मुंबई महापालिकेकडून मंडपासाठी परवानगी मिळत होती. विशेष म्हणजे अर्ज करण्यासाठी मूर्तिकारांना स्वतः सर्वत्र फिरावे लागत होते. मात्र आता मूर्तिकारांना घरबसल्या ऑनलाईन अर्ज करता येणार आहे. मंडप परवानगी देण्यासाठी महानगरपालिका प्रशासनाने एक खिडकी कार्यपद्धती सुरू केली आहे.
हेही वाचा >>> मुंबई: धरणक्षेत्रात पावसाची विश्रांती, पाणीसाठा १८.२९ टक्क्यांवर
मंडप परवानगीसाठी मूर्तिकार, मूर्ती साठवणुकदाराला अर्जासह स्वतःच्या आधार कार्डाची स्वयंसाक्षांकीत प्रत जोडावी लागणार आहे. त्याशिवाय हमीपत्र देणे बंधनकारक आहे. ऑनलाईन प्रणालीतून हे हमीपत्र डाऊनलोड करावे, त्यावर संबंधितांनी स्वाक्षरी करून अपलोड करावे व अर्जासह सादर करावे, असे आवाहन महानगरपालिकेने केले आहे. गणेश मूर्तिकारांनी मागील वर्षी दिलेल्या मंडप परवानगीचा क्रमांक अर्जामध्ये नमूद करावा. ज्या मूर्तिकारांनी यापूर्वी विभाग कार्यालयात असंगणकीय पद्धतीने (ऑफलाईन) अर्ज केला होता, त्यांनी त्याची प्रत संगणकीय अर्जासह सादर करावी, असेही आवाहन महानगरपालिकेने केले आहे.
ही ऑनलाईन सुविधा मुंबई महानगरपालिकेच्या https://portal.mcgm.gov.in या वेबसाईटवर उपलब्ध आहे. मंडळांना २३ ऑक्टोबर २०२३ पर्यंत सायंकाळी ५.३० पर्यंत ऑनलाईन पद्धतीने अर्ज करता येतील.
