मुंबई : मध्य रेल्वेवरील मुंबई विभागात विविध अभियांत्रिकी आणि देखभालीची कामे करण्यासाठी रविवारी मेगाब्लॉक घेण्यात आला आहे. परंतु, या दिवशी गुढीपाडवा असल्याने, रेल्वे प्रवास करणाऱ्या प्रवाशांचे काहीसे हाल होणार आहेत. पश्चिम रेल्वेवर शनिवारी रात्रकालीन ब्लॉक असल्याने, माहीम, माटुंगा रोड, प्रभादेवी, लोअर परळ, महालक्ष्मी या स्थानकात लोकल थांबा नसेल. मात्र, पश्चिम रेल्वेवर रविवारी दिवसकालीन ब्लॉक नसल्याने सणाच्या दिवशी प्रवाशांना प्रवास करणे सोयीस्कर होईल. त्यामुळे सणउत्सवाच्या दिवशी पश्चिम रेल्वेच्या निर्णयाने प्रवाशांना मोठा दिलासा मिळाला आहे.
मध्य रेल्वे (मुख्य मार्ग)
कुठे : ठाणे ते कल्याण स्थानकादरम्यान अप आणि डाऊन धीम्या मार्गावर
कधी : रविवारी सकाळी ११ ते दुपारी ४ वाजेपर्यंत
परिणाम : ब्लाॅक कालावधीत मुलुंड येथून सुटणाऱ्या डाऊन धीम्या लोकल मुलुंड ते कल्याण स्थानकांदरम्यान डाऊन जलद मार्गावर वळवण्यात येतील. या लोकल सेवा ठाणे, कळवा, मुंब्रा, दिवा, डोंबिवली स्थानकांवर थांबतील.
हार्बर मार्ग
कुठे : कुर्ला आणि वाशी स्थानकांदरम्यान अप आणि डाऊन मार्गावर
कधी : सकाळी ११.१० ते दुपारी ४.१० वाजेपर्यंत
परिणाम : ब्लॉक कालावधीत छत्रपती शिवाजी महाराज टर्मिनस ते वाशी/बेलापूर/पनवेल अप आणि डाऊन लोकल सेवा रद्द असतील. ब्लॉक काळात छत्रपती शिवाजी महाराज टर्मिनस मुंबई ते कुर्ला आणि पनवेल ते वाशी विभागांवर विशेष लोकल चालवल्या जातील. ब्लॉक काळात हार्बर मार्गावरील प्रवाशांना ठाणे ते वाशी/नेरुळ स्थानकांदरम्यान सकाळी १० ते सायंकाळी ६ वाजेपर्यंत प्रवास करण्याची परवानगी असेल. कल्याण येथून सुटणाऱ्या अप धीम्या लोकल कल्याण ते मुलुंड स्थानकांदरम्यान अप जलद मार्गावर वळवल्या जातील. या लोकल डोंबिवली, दिवा, मुंब्रा, कळवा, ठाणे स्थानकांवर थांबतील. तसेच मुलुंड स्थानकावर अप धीम्या मार्गावर पुन्हा वळवल्या जातील.
कुठे : सांताक्रूझ ते माहीम अप आणि डाऊन धीम्या मार्गावर
कधी : शनिवारी रात्री १२.३० ते पहाटे ४.३० वाजेपर्यंत परिणाम : ब्लाॅक कालावधीत पश्चिम रेल्वेवरील डाऊन धीम्या लोकल सेवा मुंबई सेंट्रल ते सांताक्रूझ दरम्यान डाऊन जलद मार्गावर चालवण्यात येतील. लोअर परळ, माहीम, खार रोड स्थानकाच्या फलाटाची लांबी कमी असल्याने, या स्थानकात लोकल दोनदा थांबा घेतील. तर, महालक्ष्मी, प्रभादेवी आणि माटुंगा रोड स्थानकात जलद मार्गाचे फलाट उपलब्ध नसल्याने, या स्थानकात लोकल थांबा नसेल. तसेच सांताक्रूझ ते मुंबई सेंट्रल/चर्चगेट दरम्यानची अप धीमी लोकल सेवा अप जलद मार्गावर चालवण्यात येईल. या लोकल खार रोड येथे दोनदा थांबा घेतील. तर, माहीम, माटुंगा रोड, प्रभादेवी, लोअर परळ, महालक्ष्मी स्थानकात या लोकलला थांबा नसेल. तर, रविवारी पश्चिम रेल्वेवर कोणताही ब्लाॅक नसेल.
