मुंबई : मध्य रेल्वेवरील विविध अभियांत्रिकी आणि देखभालीची कामे पूर्ण करण्यासाठी रविवारी मेगाब्लाॅक घेण्यात येणार आहे. तर, पश्चिम रेल्वेवर रविवारी दिवसकालीन मेगाब्लाॅक न घेता शनिवारी रात्रकालीन ब्लाॅक घेण्यात येणार आहे.
मध्य रेल्वे
मुख्य मार्ग
कुठे : सीएसएमटी ते विद्याविहार अप आणि डाऊन धीम्या मार्गावर
कधी : रविवारी सकाळी १०.५५ ते दुपारी ३.५५ वाजेपर्यंत
परिणाम : ब्लाॅक कालावधीत सीएसएमटी ते विद्याविहार स्थानकांदरम्यान धीम्या मार्गावरील लोकल सेवा जलद मार्गावर वळवण्यात येणार आहे. यावेळी लोकल भायखळा, परळ, दादर, माटुंगा, शीव आणि कुर्ला या स्थानकावर थांबतील.
हार्बर मार्ग
कुठे : मानखुर्द ते नेरुळ दरम्यान अप आणि डाऊन मार्गावर
कधी : रविवारी सकाळी ११.१५ ते दुपारी ४.१५ वाजेपर्यंत
परिणाम : ब्लाॅक कालावधीत सीएसएमटी ते पनवेल / बेलापूर / वाशीकडे अप आणि डाऊन लोकल फेऱ्या रद्द करण्यात येणार आहेत. ब्लॉक कालावधीत सीएसएमटी ते मानखुर्द दरम्यान विशेष लोकल फेऱ्या धावतील. हार्बर मार्गावरील प्रवाशांना सकाळी १० ते दुपारी ४.३० या कालावधीत ट्रान्स हार्बर / मुख्य मार्गावर प्रवास करण्याची परवानगी देण्यात आली आहे.
पश्चिम रेल्वे
कुठे : सांताक्रूझ ते माहीम अप आणि डाऊन धीम्या मार्गावर
कधी : शनिवारी रात्री १२.३० ते पहाटे ४.३० वाजेपर्यंत
परिणाम : ब्लाॅक कालावधीत अप धीम्या मार्गावरील काही लोकल अंधेरी ते चर्चगेट दरम्यान जलद मार्गावर धावतील. या लोकलचा अंधेरी – वांद्रे – दादर – मुंबई सेंट्रल – चर्चगेट असा मार्ग असेल.
