मानखुर्दच्या शासकीय बालगृहात पाच गतिमंद मुलांचा मृत्यू

आदिवासींच्या कुपोषण आणि बालमृत्यूंमुळे राज्यात तीव्र संताप व्यक्त होत असतानाच, मुंबईत मानखुर्द येथील ‘द चिल्ड्रेन्स एड सोसायटी’च्या बालगृहात दीड महिन्यात एका महिलेसह इतर पाच गतिमंद मुलांचा मृत्यू झाल्याची धक्कादायक बाब उघडकीस आली आहे. या मुलांच्या निवासाच्या जागेतील पाण्याची गळती तसेच गलिच्छ स्वच्छतागृहांमुळे  फैलावलेल्या आजारामुळेच या मुलांचा मृत्यू झाल्याचा आरोप होत असून, या प्रकरणी सखोल चौकशीची मागणी जोर धरू लागली आहे.

या बालगृहात २८५ मुले राहातात. त्यात १५० मुलींचा समावेश आहे. मुली व मुलांच्या निवासाच्या जागेत पावसाळ्यात पाणीगळती होते. स्वच्छतागृहे अस्वच्छ असतात. या मुलांचा आहार तसेच औषधांसाठी प्रत्यक्षात सुमारे तीन हजार रुपयांची गरज असताना शासनाकडून प्रतिमुलामागे ९३५ रुपये देण्यात येतात. या मुलांच्या आरोग्याच्या तपासणीसाठी तज्ज्ञ डॉक्टरांची तर सोडाच, एमबीबीएस डॉक्टरचीही नियुक्ती करण्यात आलेली नसून ‘बीएएमएस’ डॉक्टरांच्या माध्यमातून यांच्या आरोग्याची तपासणी केली जाते. पावसाळ्यात यातील अनेक मुले आजारी पडत असून गेल्या दीड महिन्यात तापाने आजारी पडलेल्या १८ वर्षांखालील पाच मुलांना व तिशीच्या एका महिलेला पालिकेच्या शीव रुग्णालयात दाखल करण्यात आले. त्यानंतर साधारणपणे तीन-चार दिवसांतच या मुलांचा मृत्यू झाल्याचे सूत्रांनी सांगितले. अजित, मिथून, डेव्हीड, अरुण, मुक्का अशी या मुलांची तर लीला असे या मृत महिलेचे नाव आहे.

मुख्यमंत्री देवेंद्र फडणवीस यांच्या अध्यक्षतेखाली, महिला व बालविकास मंत्री पंकजा मुंडे उपाध्यक्ष असलेली गव्हर्निग कमिटी नियुक्त करणे अपेक्षित असताना गेल्या वर्षांपासून या बालगृहांचा कारभार चालविण्यासाठी यंत्रणाच स्थापन करण्यात आलेली नाही. येथील २७ कर्मचाऱ्यांना पाच महिन्यांनंतर ऑक्टोबरमध्ये वेतन देण्यात आले तर १८ कर्मचाऱ्यांना गेल्या दहा महिन्यांपासून वेतनच मिळालेले नाही. आजारी अवस्थेत असलेली बालके तीव्र मतिमंद असल्याचे येथील अधीक्षक राहुल कंटीकर यांनी सांगितले. या सहा जणांचा आजारपणाने मृत्यू झाल्याचे कंटीकर यांनी मान्य केले. तसेच मुख्याधिकारी बी.जी. भवानी यांनीही ही बाब मान्य केली असून येथील कर्मचारी संघटनेचे अध्यक्ष मिलिंद तुळस्कर यांनी मुख्यमंत्री देवेंद्र फडणवीस व महिला बालकविकास मंत्री पंकजा मुंडे यांना पत्र पाठवून या मृत्यूंबाबत माहिती देताना येथील अपुरा औषधोपचार व ढिसाळ कारभाराचे ही मुले बळी ठरल्याचे नमूद केले आहे. या मुलांच्या मृत्यूची सखोल चौकशी करण्याची मागणीही त्यांनी केली आहे.

बालगृह दुरुस्ती, तज्ज्ञ डॉक्टरांची गरज

या बालगृहाच्या दुरुस्तीची नितांत गरज आहे. दानशूर व्यक्तींकडून येणाऱ्या औषध व अन्य मदतीवर आज संस्थेचे काम चालत असल्याचे मिलिंद तुळसकर यांनी सांगितले. कर्मचाऱ्यांना अनेक महिने वेतन न देणे, गव्हर्निग कमिटीची नियुक्ती न करणे आणि प्रशासकीय ढिसाळपणाचे हे बळी असून येथील मुलांना सातत्याने पालिकेच्या शीव तसेच शताब्दी रुग्णालयात दाखल करावे लागत असताना तज्ज्ञ डॉक्टरांची नियुक्ती करण्यात आलेली नाही. येथे अवघ्या तीन परिचारिका असून, विशेष मुलांच्या आरोग्याची विशेष काळजी घेण्याची आवश्यकता असताना त्यासाठी पुरेसे तज्ज्ञ कर्मचारी नसल्याचेही सूत्रांचे म्हणणे आहे.