Metro 3 कधी सुरू होणार? MMRCL चा घोळात घोळ, आधी विनोद तावडे, आता Indian Infra च्या VIDEO मुळे गोंधळ

दरम्यान, आता इंडियन टेक अँड इन्फ्रा या एका व्हेरीफाईड एक्स अकाऊंटवरून एका भूयारी रेल्वेचा व्हिडीओ शेअर करण्यात आला आहे. यासह कॅप्शनमध्ये म्हटलं आहे की बहुप्रतीक्षित मेट्रो ३ च्या पहिल्या टप्प्याचं (वांद्रे कुर्ला संकूल ते सीप्झ) आजपासून (२५ जुलै) परिचालन (Operations) सुरू झालं आहे. याबाबत मुंबई मेट्रो रेल कॉर्पोरेशनकडे विचारणा केली असता त्यांनी हे दावे फेटाळून लावले आहेत. प्रसारमाध्यमांच्या प्रतिनिधींनी मेट्रो ३ बाबत अधिक माहितीसाठी एमएमआरसीएलशी संपर्क करण्याचा प्रयत्न केला. मात्र त्यांच्याकडून पुरेशी माहिती मिळाली नाही. त्यामुळे मुंबई मेट्रो ३ कधी सुरू होणार हा प्रश्न अनुत्तरितच राहिला आहे.

भाजपाचे राष्ट्रीय सरचिटणीस विनोद तावडे यांनी गेल्या आठवड्यात (बुधवार, १७ जुलै) एक्सवर एक पोस्ट केली. याद्वारे ‘मेट्रो ३’चे लोकार्पण होणार असल्याचं त्यांनी जाहीर केलं होतं. २४ जुलै रोजी मेट्रो ३ चं लोकर्पण होईल, अस त्यांनी म्हटलं होतं. मात्र काही वेळाने त्यांनी ती पोस्ट डिलीट केली. त्यामुळे मेट्रो ३ चं लोकार्पण कधी करायचं याबाबत राज्यकर्ते आणि प्रशासनात ताळमेळ नसल्याची टीका होऊ लागली आहे.

हे ही वाचा >> Mumbai Rain : मुसळधार पावसामुळे मंदावला विमानसेवेचा वेग, एअर इंडियाने केलं ‘हे’ आवाहन

मेट्रो ३ का खोळंबली?

मुंबई मेट्रो रेल कॉर्पोरेशनकडून (एमएमआरसी) ३३.५ किमी लांबीच्या भुयारी ‘मेट्रो ३’चे काम चालू आहे. या मार्गिकेतील आरे – बीकेसी दरम्यानच्या पहिल्या टप्प्याचं काम पूर्ण झाल्याचं एमएमआरसीएलने सांगितलं होतं. आता केवळ मेट्रो आयुक्त, मेट्रो रेल्वे सुरक्षा (सीएमआरएस) यांच्याकडून चाचण्या करून घेणं बाकी आहे. ही प्रक्रिया लवकर सुरू होणार आहे. ही प्रक्रिया पूर्ण होण्यास एक ते दीड महिने लागतील, त्यानंतर मेट्रोला हिरवा कंदील दाखवला जाईल.