मुंबई : बसस्थानक हे शहराचे मध्यवर्ती ठिकाण असते. किंबहुना ते मोक्याच्या ठिकाणी असते. त्यामुळे व्यापार- उदीम विकसित होतो, हे ओळखून गुजरात राज्य मार्ग परिवहन महामंडळाने बसस्थानक परिसरामध्ये व्यावसायिक वापरासाठी ‘व्यापारी संकुल’ आणि त्यामधून येणाऱ्या महसुलाद्वारे प्रवाशांसाठी अत्याधुनिक सोयी-सुविधा असलेले ‘बसपोर्ट’ निर्माण करून एक प्रकारे व्यापार आणि प्रवासी दळणवळणचा सुंदर मिलाफ साधला आहे, असे प्रतिपादन परिवहन मंत्री प्रताप सरनाईक यांनी केले. ते गुजरात राज्य मार्ग परिवहन महामंडळाच्या बसपोर्ट प्रकल्पाची माहिती घेताना बोलत होते.

या बातमीसह सर्व प्रीमियम कंटेंट वाचण्यासाठी साइन-इन करा
Skip
या बातमीसह सर्व प्रीमियम कंटेंट वाचण्यासाठी साइन-इन करा

या दौऱ्यादरम्यान गुजरातचे परिवहन मंत्री हर्ष संघवी यांच्यासोबतही सरनाईक यांची बैठक पार पडली. या बैठकीत दोन्ही राज्यांतील परिवहन सेवेबाबत चर्चा करण्यात आली. यावेळी गुजरात राज्य मार्ग परिवहन महामंडळचे उपाध्यक्ष व व्यवस्थापकीय संचालक एम. नागार्जन यांनी शिष्टमंडळाला त्यांच्या परिवहन सेवेची माहिती दिली. त्यामध्ये गुजरात परिवहन महामंडळामार्फत चालवण्यात येणारी एकात्मिक नियंत्रण प्रणाली अत्यंत चांगली असून महाराष्ट्र राज्य मार्ग परिवहन महामंडळामध्येही अशा प्रकारची सुविधा असणे गरजेचे आहे, असे मत सरनाईक यांनी व्यक्त केले.

यावेळी गुजरातमधील अहमदाबाद व वडोदरा येथील बसपोर्टची सरनाईक याच्या नेतृत्वाखालील शिष्टमंडाळाने पाहणी केली. प्रवाशांना बसस्थानकावर कोणकोणत्या सोयी-सुविधा दिल्या जातात, याबद्दलची माहिती संबंधित अधिकाऱ्यांनी शिष्टमंडळात दिली. विशेष करून बसस्थानकावर विश्रांतीसाठी थांबणाऱ्या प्रवाशांना प्रशासनाने कमी दरात ‘प्रवासी विश्रांतीगृह’ उपलब्ध केले आहे, त्याचे सरनाईक यांनी कौतुक केले. तसेच गुजरात परिवहन महामंडळाच्या अत्याधुनिक बसचीही त्यांनी पाहणी केली.

हेही वाचा

इतर राज्यात ज्या चांगल्या गोष्टी घडत आहेत, त्यांना भेट देऊन त्या आपल्या राज्यात कशा अमलात आणता येतील याचा अभ्यास करावा. जेणेकरून विविध ठिकाणच्या नाविन्यपूर्ण योजना आपल्या राज्यातील सर्वसामान्य जनतेच्या सेवेसाठी उपलब्ध होतील, असे पंतप्रधान नरेंद्र मोदी यांनी सर्व लोकप्रतिनिधींना मार्गदर्शन करताना सांगितले होते. याचाच एक भाग म्हणून गुजरात राज्य मार्ग परिवहन सेवेमार्फत चालवल्या जाणाऱ्या बसपोर्ट प्रकल्पाची माहिती घेणे, तसेच त्यांच्या प्रादेशिक परिवहन व्यवस्थापनाचा अभ्यास करणे, त्याबरोबर कर्मचाऱ्यांसाठी राबवत असलेल्या प्रोत्साहन योजना जाणून घेण्यासाठी या दौऱ्याची आखणी केली होती. इतर राज्यातील परिवहन सेवांचा अभ्यास करून चांगल्या कल्पना आपल्या एसटी महामंडळामध्ये राबवणे शक्य आहे का, याची देखील चाचपणी या दौऱ्याच्या निमित्ताने करण्यात आली. परिवहन मंत्री प्रताप सरनाईक त्यांच्यासोबत महाराष्ट्र राज्य मार्ग परिवहन महामंडळाचे प्रभारी उपाध्यक्ष व व्यवस्थापकीय संचालक विवेक भीमनवार, नितीन मैद (महाव्यवस्थापक वाहतूक) व नंदकुमार कोलारकर (महाव्यवस्थापक यंत्र ) दिनेश महाजन (महाव्यवस्थापक बांधकाम) आदी यावेळी उपस्थित होते.