मेट्रो स्थानकांतील स्वच्छता सुधारणांसाठी ‘ॲप’ प्रवाशांच्या सूचना, तक्रारी जाणून घेण्यासाठी ‘एमएमएमओपीएल’चा पुढाकार

‘मेट्रो २ अ’ आणि ‘मेट्रो ७’ मार्गिकांवरील प्रवाशांचा प्रवास सुकर व्हावा यासाठी एमएमआरडीए आणि एमएमएमओसीएलकडून वेळोवेळी आवश्यक ते बदल वा नवीन सुविधा उपलब्ध करण्यात येत आहेत. प्रवाशांना रांगेत उभे राहवे लागू नये याकरिता व्हॉटस अॅप तिकिट सेवेसह विविध सुविधा उपलब्ध करण्यात येत आहेत. आता प्रवाशांना मेट्रो प्रवासादरम्यान स्वच्छ, चकाचक प्रसाधनगृह उपलब्ध करण्यावर विशेष लक्ष दिले जात आहे. एमएमएमओसीएलकडून टॉयलेट सेवा नावाने एक अॅप कार्यान्वित करण्यात आले आहे. मेट्रो स्थानकावरील क्युआर कोड स्कॅन करून टॉयलेट सेवा ॲप डाऊनलोड करता येणार आहे. तर ‘मेट्रो २ अ’ आणि ‘मेट्रो ७’ मार्गिकांवरील ३० मेट्रो स्थानकांमधील प्रसाधनगृह अस्वच्छ असेल, पाणी नसेल, पुरेसे पाणी नसेल वा इतर कोणत्याही तक्रारी असतील तर त्या प्रवाशांना या ॲपवर नोंदवता येतील, अशी माहिती एमएमएमओसीएलकडून देण्यात आली. या तक्रारींची तात्काळ नोंद घेत स्वच्छ प्रसाधनगृह उपलब्ध करण्यात येणार आहे.

हेही वाचा…म्हाडा मुंबई मंडळ सोडत २०२४ : अखेर प्रतीक्षा यादीवरील ४०६ विजेत्यांना हक्काच्या घराचे स्वप्न पूर्ण करण्याची संधी

मागणीनुसार उपलब्धता

महिला, पुरुष प्रवाशांच्या तक्रारींसोबतच काही सूचना असतील तर त्याचीही नोंद या अॅपद्वारे तात्काळ घेतली जाणार आहे. काही मेट्रो स्थानकांत सॅनिटरी नॅपकीन वेंडींग यंत्राची सेवा उपलब्ध करण्यात आली आहे. मात्र काही स्थानकांवरील प्रसाधनगृहात ही सुविधा उपलब्ध नाही. त्यासाठी अॅपवर मागणी केल्यास ही सुविधा उपलब्ध करण्यात येणार आहे. महिलांच्या दृष्टीने आवश्यक त्या इतर सुविधांही मागणीनुसार उपलब्ध करण्यात येणार आहेत, असेही एमएमएमओसीएलकडून सांगण्यात आले.