“वीरप्पन गँगचा अजून एक कारनामा”, मनसे नेते संदीप देशपांडेंचं सूचक ट्वीट!

संदीप देशपांडेंनी आपल्या ट्वीटमध्ये एक व्हिडीओ शेअर केला आहे. या व्हिडीओमध्ये संदीप देशपांडे मुंबईतील मोठ्या भ्रष्टाचाराचा पर्दाफाश करण्याचा इशारा देताना दिसत आहेत. “भ्रष्टाचार करणारे अनेक नगरसेवक तुम्ही पाहिले असतील. पण भ्रष्टाचाराचे पैसे चेकने घेणारे नगरसेवक तुम्ही पाहिले नसतील. लवकरच मनसे त्यांचा पुराव्यासकट पर्दाफाश करणार आहे”, असं संदीप देशपांडे म्हणाले आहेत. त्यामुळे आता मनसेकडून कोणत्या नगरसेवकावर निशाणा साधला जाणार आणि कुणाचा तसेच कोणता भ्रष्टाचार बाहेर काढला जाणार, याची चर्चा मुंबईच्या राजकीय वर्तुळात रंगू लागली आहे.

पुढील वर्षी फेब्रुवारी महिन्यात मुंबई महानगर पालिकेच्या निवडणुका अपेक्षित आहेत. या पार्श्वभूमीवर मुंबईत सर्वच प्रमुख राजकीय पक्षांकडून जोरदार तयारी सुरू करण्यात आली आहे. भाजपा, शिवसेना, मनसे या तिन्ही पक्षासोबतच काँग्रेस, राष्ट्रवादी काँग्रेस या पक्षांकडून देखील पालिका निवडणुकांसाठी तयारी सुरू करण्यात आलेली आहे.