अभिषेक घोसाळकरांच्या हत्येपूर्वी मॉरिसने केलेली ‘ती’ पोस्ट चर्चेत! गोळीबाराच्या घटनेशी थेट कनेक्शन?

अभिषेक घोसाळकर आणि मॉरिस नोरोन्हा गुरूवारी संध्याकाळी (८ फेब्रुवारी) एकत्र फेसबुक लाईव्ह करत होते. लाईव्ह संपत आलं तेव्हा मॉरिस खोलीतून बाहेर गेला, त्यानं पिस्तुल काढलं आणि पुन्हा खोलीत शिरुन घोसाळकरांवर गोळीबार केला. अतिरक्तस्त्राव झाल्याने त्यांचा मृत्यू झाला. या प्रकरणाचा तपास गुन्हे शाखेकडे वर्ग करण्यात आला आहे.

हे पण वाचा- अभिषेक घोसाळकरांवर गोळीबार करण्यापूर्वी मॉरिसचे शब्द होते, “आज बहुत लोग..”

मॉरिस नोरोन्हा हा दहिसर-बोरिवली परिसरात राहायचा. या भागात तो मॉरिस भाई म्हणून परिचीत होता. तो अनेकवेळा परदेश दौरेही करत होता. नुकतंच तो अमेरिकेतील लॉस एंजल्सवरून आला होता. राजकीय महत्वाकांक्षेपोटी त्याने महापालिकेच्या निवडणुकीची तयारी सुरू केली होती. ज्या भागाचं नेतृत्व अभिषेक घोसाळकर करतात, त्याच भागातून मॉरिस निवडणुकीची तयारी करत होता. मात्र घोसाळकर त्याला विरोधक ठरत होते. आता याच मॉरिसची एक पोस्ट चांगलीच चर्चेत आली आहे. त्यावरुन त्याने हत्या करायची हे आधीच ठरवलं होतं का? याची चर्चा सोशल मीडियावर होते आहे.

काय आहे मॉरिसची एक्स पोस्ट?

‘You can’t defeat a man, who doesn’t care about pain, loss, disrespect, Heart Break and rejection’. मॉरिस नोरान्हानं २९ जानेवारीला केलेली ही पोस्ट. ही पोस्ट त्याने अभिषेक घोसाळकरांवर गोळीबार करण्यापूर्वी १० दिवस आधी केली होती.

८ फेब्रुवारीला मॉरिसने जे काही कृत्य केलं त्याचा इशाराच जणू त्याने या पोस्टमधून दिला होता का? याची चर्चा होते आहे. कारण जेव्हा त्यांनं अभिषेक घोसाळकरवर गोळ्या झाडल्या, त्याच्या काही मिनिटं आधी फेसबुक लाईव्हमध्ये अभिषेक घोसाळकरांच्याच बाजूला बसून त्यानं एक डायलॉग मारला होता. तो म्हणाला होता आज बहुत सारे लोग सरप्राईज होंगे. या डायलॉगनंतर पुढच्या पाच ते सात मिनिटात त्याने अभिषेक घोसाळकरांवर गोळ्या चालवल्या आणि त्यानंतर आत्महत्या केली.