मुंबई: एसटी महामंडळातील प्रशासकीय अधिकारी, कर्मचाऱ्यांना अखेर बुधवारी वेतन मिळाले. यासाठी महामंडळाने मिळणाऱ्या प्रवासी उत्पन्नातून उर्वरित कर्मचाऱ्यांचे वेतन अदा केले आहे. या महिन्याचे वेतन पुढील महिन्यात मिळावे यासाठी राज्य शासनाकडे एसटी महामंडळाने आर्थिक मदत मागितली आहे.
हेही वाचा >>>लटके यांचा दोनदा राजीनामा ; राजीनाम्याचा घोळ मर्जीतील उमेदवारासाठी ; भाजपचा आरोप
राज्य सरकारकडून तुटपुंजा निधी उपलब्ध झाल्याने एसटी महामंडळाच्या राज्यातील सुमारे १० हजार प्रशासकीय अधिकारी, कर्मचाऱ्यांना ऐन दिवाळीच्या तोंडावर सप्टेंबरचे वेतन ऑक्टोबरची सात तारीख उलटूनही मिळाले नव्हते. त्यामुळे कर्मचाऱ्यांमध्ये नाराजी होती. एसटी महामंडळ चार वर्षात फायद्यात येईल, या अटीवर कर्मचाऱ्यांच्या वेतनासाठी निधी देण्याची जबादारी राज्य सरकारने कर्मचाऱ्यांच्या संपकाळात घेतली होती. त्यानुसार दर महिना वेतनासाठी ३६० कोटी रुपये मिळू लागले. मात्र गेल्या तीन महिन्यात ३६० कोटी रुपयांऐवजी महिन्याला १०० कोटी रुपयेच वेतनासाठी शासनाने दिले. त्यामुळे अधिकारी आणि कर्मचाऱ्यांच्या वेतनाचा प्रश्न निर्माण झाला होता. मात्र, अखेर बुधवारी अधिकारी, कर्मचाऱ्यांचे वेतन झाले.
दरम्यान, एसटीच्या राज्यातील सर्वच कर्मचाऱ्यांना दिवाळीनिमित्त सानुग्रह अनुदान देण्याचे विचाराधीन असल्याची माहिती, एसटीतील एका वरिष्ठ अधिकाऱ्याने दिली. दिवाळीत एसटी अधिकाऱ्यांना पाच हजार रुपये आणि कर्मचाऱ्यांना अडीच हजार रुपये सानुग्रह अनुदान दिले जाते.
