मुंबई: घराबाहेर पार्क केलेल्या महागड्या दुचाकी चोरून त्यांची विक्री करणाऱ्या एका सराईत आरोपीला ट्रॉम्बे पोलिसांनी अटक केली आहे. या आरोपीच्या ताब्यातून पोलिसांनी तीन दुचाकी हस्तगत केल्या असून पोलीस याबाबत अधिक तपास करत आहेत.
ट्रॉम्बेच्या चिता कॅम्प परिसरात राहणारे अन्वर खान (२८) या तरुणाने त्याची दुचाकी ३० जुलैला घराजवळ उभी केली होती. मात्र त्याच रात्री चोरट्याने बनावट चावीच्या आधारे ती चोरून पोबारा केला. याबाबत खान यांनी ट्रॉम्बे पोलीस ठाण्यात तक्रार दाखल केल्यानंतर पोलिसांनी गुन्हा दाखल करून तपास सुरू केला. परिसरातील काही सीसीटीव्ही चित्रण ताब्यात घेऊन पोलिसांनी पाहणी केली असता त्यात आरोपीचा चेहरा कैद झाला होता. त्यानुसार पोलिसांनी आरोपीची ओळख पटवून चिता कॅम्प परिसरातूनच त्याला अटक केली.
हेही वाचा – मुंबई : पोलीस ठाण्यातून आरोपीचा पळण्याचा प्रयत्न, पायाला दुखापत
फरदिन सय्यद (१९) असे आरोपीचे नाव असून तो त्याच परिसरातील राहणारा आहे. तपासात त्याने गुन्ह्याची कबुली देत, अशाच प्रकारे तीन दुचाकी चोरल्याची माहिती पोलिसांना दिली आहे. त्यानुसार पोलिसांनी आरोपीच्या ताब्यातून तीन दुचाकी हस्तगत केल्या असून पोलीस त्याच्याकडे याबाबत अधिक तपास करत आहेत.
