अमली पदार्थ विरोधी पथकाने (एनसीबी) मुंबईत मोठी कारवाई केली आहे. मुंबईच्या समुद्रात क्रूझवर सुरु असलेल्या एका रेव्ह पार्टीवर धाड टाकत एनसीबीने आठ जणांना ताब्यात घेतलं आहे. यावेळी मोठ्या प्रमाणात ड्रग्जदेखील जप्त करण्यात आलं आहे. दरम्यान यावेळी क्रूझवर बॉलिवूड सुपरस्टार शाहरुख खानचा मुलगा आर्यन खानदेखील उपस्थित होता असा दावा आहे. इंडिया टुडेने सूत्रांच्या हवाल्याने दिलेल्या वृत्तानुसार, आर्यन खानची देखील अधिकाऱ्यांकडून चौकशी केली जात आहे.
मुंबईतील रेव्ह पार्टी प्रकरणी शाहरुख खानचा मुलगा आर्यन खान एनसीबीच्या ताब्यात
दरम्यान सूत्रांनी दिलेल्या वृत्तानुसार, आर्यन खानला क्रूझवरील पार्टीमध्ये पाहुणा म्हणून बोलावण्यात आलं होतं. पार्टीत जाण्यासाठी त्याला कोणतेही पैसे भरावे लागले नव्हते. चौकशीदरम्यान आर्यन खानने कार्यक्रमाच्या आयोजकांना आपल्या नावाचा वापर करत इतरांना आमंत्रण दिलं असा दावा केला आहे.
ही क्रूझ मुंबईहून गोव्याकडे जात होती. माहितीनुसार, ताब्यात घेतलेल्यांपैकी दोघे हरियाणा आणि दिल्लीतील ड्रग तस्कर आहेत. प्रत्येक व्यक्तीने या पार्टीत प्रवेशासाठी ८० हजारांपेक्षा जास्त फी भरली होती.
एनसीबीने मिळवले आर्यनचे क्रूझवरील व्हिडीओ
एनसीबी अधिकाऱ्यांनी आर्यन खानचे क्रूझवरील व्हिडीओ मिळवले आहेत. सूत्रांनी दिलेल्या माहितीनुसार, या व्हिडीओंमध्ये आर्यन खान सफेद टी-शर्ट, लाल शर्ट, निळी जीन्स आणि टोपीत दिसत आहे.
आर्यनचा मोबाइल जप्त, चॅट्सची तपासणी
एनसीबी अधिकाऱ्यांनी आर्यन खानचा मोबाइल फोन जप्त केला असून त्यामधील चॅट्स आणि टेक्स्ट मेसेजेची तपासणी केली जात आहे. याशिवाय ताब्यात घेतलेल्या इतरांचेही मोबाइल तपासले जात आहेत.
दिल्लीमधील उद्योगपतीच्या तीन मुली ताब्यात
सूत्रांच्या माहितीनुसार, क्रूज पार्टीसाठी दिल्लीहून आलेल्या तीन मुलींनाही ताब्यात घेण्यात आले असून त्यांची चौकशी केली जात आहे. दिल्लीतील एका नामवंत उद्योगपतीच्या या मुली असल्याची सूत्रांची माहिती आहे.
एनसीबीकडून आयोजकांना समन्स
एनसीबीने पार्टी आयोजकांना चौकशीसाठी समन्स बजावलं आहे. एफटीव्ही इंडियाचे व्यवस्थापकीय संचालक काशीफ खानदेखील रडारवर असून त्यांच्याशी संपर्क साधण्यात आला आहे. ही पार्टी आयोजित करण्यात त्यांचा हात असल्याची सूत्रांची माहिती आहे.
एनसीबीने जाहीर केली चौकशी सुरु असलेल्यांची यादी –
१) मुनमून धमेचा (Munmun Dhamecha)
२) नुपूर सारिका (Nupur Sarika)
३) इस्मीत सिंग (Ismeet Singh)
४) मोहक जसवाल (Mohak Jaswal)
५) विक्रम छोकेर (Vikrant Chhoker)
६) गोमित चोप्रा (Gomit Chopra)
७) आर्यन खान (Aryan Khan)
८) अरबाज मर्चंट (Arbaaz Merchant)
अरबाज मर्चंट हा शाहरुख खानचा मुलगा आर्यन खानचा जवळचा मित्र आहे.
