दसरा मेळाव्यासाठी ठाकरेंना परवानगी मिळाल्यानंतर सुषमा अंधारेंचा CM शिंदेंना टोला; म्हणाल्या, “खरा शिवसैनिक सुरतला पळून…”

यंदाचा दसरा मेळावा हा नेहमीप्रमाणे उत्साहात साजरा केला जाणार आहे, असं सुषमा अंधारे यांनी उच्च न्यायालयाने दिलेल्या निकालानंतर प्रसारमाध्यमांशी संवाद साधताना म्हटलं आहे. तसेच, “दसरा मेळाव्यातील भाषण हे अनेकांच्या जिव्हारी लागणारं असेल. महाराष्ट्रात उद्धव बाळासाहेब ठाकरे या नावाचा दरारा कायम असेल, याचं समाधान आहे,” असंही अंधारे यांनी म्हटलं आहे.

तसेच शिंदे गट आणि उद्धव ठाकरे गटाच्या वादामध्ये बाळासाहेबांच्या नावाचा वापर केला जातोय यासंदर्भातही पत्रकारांनी अंधारे यांना प्रश्न विचारण्यात आला. त्यावर उत्तर देताना अंधारे यांनी मुख्यमंत्री शिंदेंवर निशाणा साधला. “बाळासाहेबांचा शिवसैनिक खिळाडू वृत्तीने राहतो, महिलांचा आदार करतो. रामदास कदमांसारखी विधान करत नाही. खरा शिवसैनिक सुरतला पळून जाऊ शकत नाही. खरी शिवसेना कुणाची हा विचार कोणाचा हे जनता जाणून आहे,” असंही सुषमा अंधारे यांनी म्हटलं आहे.