मुंबई : फ्लेमिंगोच्या ड्रोन चित्रिकरणाच्या प्रकरणाची कांदळवन कक्षाची चौकशी सुरू

‘सिकंदर का मुकद्दर’ या चित्रपटात ड्रोन कॅमेरा फ्लेमिंगोच्या अगदी जवळ नेऊन चित्रीकरण करण्यात आल्याबद्दल नाराजी व्यक्त करीत पर्यावरणप्रेमी, तसेच पक्षीप्रेमींनी कांदळवन कक्ष आणि महाराष्ट मुख्य वन नियंत्रक यांच्याकडे याबाबत तक्रार केली होती. या तक्रारीची दखल घेत कांदळवन कक्षाने तपासणीला सुरुवात केल्याची माहिती कांदळवन कक्षाने दिली. तपासणीदरम्यान पुरावे हाती सापडताच तात्काळ कारवाई केली जाईल, असेही अधिकाऱ्यांनी स्पष्ट केले.

हेही वाचा – आर्थिक फसवणुकीच्या गुन्ह्यांत अडकल्याची भीती दाखवून महिलेची सायबर फसवणूक

या प्रकरणाची सखोल चौकशी करून योग्य ती कारवाई करण्यात येईल. तसेच योग्य वेळी चित्रपट निर्मात्यावर नोटीस बजावण्यात येईल, असेही अधिकाऱ्यांनी सांगितले. डीपीएस तलाव तसेच एनआरआय कॉप्लेक्सच्या पाठीमागील पाणथळ परिसर, तसेच नेरूळ सीवूड्स येथील टी. एस. चाणक्य तलाव येथे दरवर्षी मोठ्या प्रमाणात फ्लेमिंगोचे आगमन होते. फ्लेमिंगोसाठी आवश्यक असलेले खाद्य, तसेच पाणथळ जागा मुबलक प्रमाणात असल्यामुळे फ्लेमिंगो येथे वास्तव्यासाठी येतात. नेरूळ येथील टी. एस. चाणक्य खाडीत हे चित्रीकरण करण्यात आल्याचे पक्षीप्रेमींचे म्हणणे आहे.

हेही वाचा – कुर्ला बस अपघातात ४३ जखमी, सात जणांचा मृत्यू; भाभा रुग्णालयात ३८, तर शीव रुग्णालयात ७ जणांवर उपचार

चित्रीकरणात ड्रोनच्या पात्यांमुळे फ्लेमिंगो जखमी होण्याची शक्यता असते. तसेच ड्रोनचा आवाजही बऱ्यापैकी असतो, यामुळे फ्लेमिंगो विचलित होऊन त्यांच्या अधिवासातून बाहर येऊ शकतात. परिणामी, कोणतीही दुर्घटना घडू शकते. यापूर्वीही या परिसरात अनेक फ्लेमिंगोचा मृत्यू झाल्याच्या घटना घडल्या आहेत. याचीच पुनरावृत्ती होऊ नये म्हणून पक्षीप्रेमींनी या प्रकरणाची कसून चौकशी करण्याची मागणी केली आहे.