मुंबई : मुंबईतील घाटकोपर- वर्सोवा मार्गावर धावणारी मुंबई मेट्रो १ ची वाहतूक सेवा बुधवारी सकाळी १० वाजल्यापासून घाटकोपर स्थानकावर असलेल्या मेट्रोचे एका बाजूचे दरवाजे उघडत नसल्यामुळे विस्कळीत झाली होती. त्यामुळे कार्यालयात जाणाऱ्यांची गैरसोय झाली. दरम्यान, मेट्रो प्रशासनाने तातडीने दुरुस्तीचे काम हाती घेतले. दुरुस्तीअंती घाटकोपर- वर्सोवादरम्यानची मेट्रो वाहतूक सुरळीत सुरू असल्याचे मेट्रो प्रशासनाने सांगितले.
हा तांत्रिक बिघाड कार्यालयीन वेळेत झाल्यामुळे घाटकोपर स्थानकांवर प्रवाशांची प्रचंड गर्दी जमली होती. मेट्रोची सेवा साधारण १५ ते २० मिनिटे विलंबाने धावत होती. त्यामुळे या मार्गावर प्रवास करणाऱ्या प्रवाशांना अडचणींना सामोरे जावे लागत होते. दरम्यान, सकाळच्या वेळी मेट्रोमध्ये मुंबईतील लोकलइतकीच गर्दी असते. त्या वेळीच तांत्रिक बिघाड झाल्यामुळे कर्मचाऱ्यांची तारांबळ उडाली. परंतु, दुरुस्ती केल्यानंतर मेट्रो सेवा सुरळीत सुरू झाली, असे मुंबई मेट्रो १च्या प्रशासनाने स्पष्ट केले. मंगळवारीदेखील तांत्रिक बिघाडामुळे वाहतूक विलंबाने मुंबई मेट्रो १ची वाहतूक मंगळवारीदेखील तांत्रिक बिघाडामुळे विलंबाने धावत होती.
