विविध कारणांमुळे गेल्या काही वर्षांपासून रखडलेल्या मुंबई मेट्रो रेल्वेला रेल्वेच्या सुरक्षा आयुक्तांनी शुक्रवारी सुरक्षा प्रमाणपत्र दिल्याने या वाहतूक सेवेच्या मार्गातील मोठा अडथळा दूर झाला आहे. मात्र, मेट्रोच्या डब्यांना रेल्वे बोर्डाकडून अद्याप मंजुरी मिळाली नसल्याने मेट्रो कधी सुरू होणार, याची घोषणा केली गेलेली नाही. प्रत्यक्षात विधानसभा निवडणुका डोळ्यांसमोर ठेवून मेट्रो सुरू करण्यात विलंब केला जात असल्याचे समजते.
मेट्रो रेल्वे सुरू करण्यासाठी अत्यावश्यक असे रेल्वे सुरक्षा आयुक्तांचे प्रमाणपत्र अखेर शुक्रवारी मिळाले. रेल्वे आयुक्तांचे सुरक्षा प्रमाणपत्र मिळाल्यानंतर आठवडाभरात ही रेल्वे सुरू केली जाईल, असे मुंबई मेट्रोचे मुख्य कार्यकारी अधिकारी अजयकुमार मिश्रा यांनी नुकतेच जाहीर केले होते. त्यामुळे येत्या आठवडाभरात मेट्रो सुरू होईल, अशी मुंबईकरांना वाटू लागली होती. परंतु आता रेल्वे बोर्डाकडून डब्यांची मंजुरी मिळाली नसल्याने मेट्रो सुरू करता येणार नाही, असे सांगितले जात आहे. त्यामुळे ही मेट्रो रेल्वे सुरू होण्यासाठी कोणता मुहूर्त साधला जातो, त्याकडे सगळ्यांचे लक्ष लागले आहे. सूत्रांच्या म्हणण्यानुसार या महिन्याच्या अखेरीस किंवा जूनच्या पहिल्या आठवडय़ात ही रेल्वे सुरू होण्याची शक्यता आहे. तर मेट्रो नेमकी कधी सुरू होणार हे सांगण्यास रिलायन्स इन्फ्रास्ट्रक्चरच्या अधिकाऱ्यांनी असमर्थता व्यक्त केली. डब्यांसाठीची मंजुरी मिळाल्यानंतरच मेट्रो सुरू होईल, असे मोघम उत्तर मेट्रोच्या प्रवक्त्यांकडून देण्यात आले.
मेट्रो रेल्वेसाठी सर्व काही ‘क्लिअर’असल्याचे रेल्वे
सुरक्षा आयुक्तांकडून शुक्रवारी सांगण्यात आले. आता रेल्वे बोर्डाकडून डब्यांच्या मंजुरीसाठीची प्रतीक्षा आहे. रेल्वे बोर्डाकडून ही अंतिम मंजुरी मिळाली की त्यानंतरच मुंबई मेट्रो रेल्वे सुरू करण्यात येईल.
– यू. पी. एस. मदान
महानगर आयुक्त, एमएमआरडीए
उशिरामागे राजकीय कारण?
मोनो रेल्वे लोकसभा निवडणुकीच्या अगोदर सुरू करण्यात आली होती. त्यामुळे मुंबई मेट्रो रेल्वे आता लोकसभा निवडणुकीचे निकाल जाहीर झाल्यानंतर आणि आगामी विधानसभा निवडणुका डोळ्यासमोर ठेवून सुरू केली जाणार असल्याचे सांगण्यात येते. विधानसभा निवडणुकीत मेट्रो सुरू करून मुंबईकरांना खास भेट दिल्याचे राजकीय भांडवल करता यावे या उद्देशानेच तिचे उद्घाटन पुढे पुढे ढकलण्यात येत असल्याचे बोलले जात आहे.
ब्रेक आणि इलेक्ट्रीक सिस्टिममध्ये तांत्रिक बिघाड?
रेल्वेचा कोणताही प्रकल्प किंवा मार्ग सुरू करण्यासाठी रेल्वे सुरक्षा आयुक्तांचे प्रमाणपत्र मिळाले की त्यानंतर अन्य कोणाच्याही परवानगीची गरज नसते. मात्र मुंबई मेट्रो रेल्वेला रेल्वे सुरक्षा आयुक्तांचे प्रमाणपत्र मिळाल्यानंतरही ही रेल्वे सुरू करण्यासाठी आता रेल्वे बोर्डाकडून डब्यांच्या मंजुरीची आवश्यकता असल्याचे सांगण्यात येत आहे. कारण मुंबई मेट्रो रेल्वेच्या ब्रेक आणि इलेक्ट्रीक सिस्टीममध्ये काही तांत्रिक बिघाड असल्याची शक्यता रेल्वे सुरक्षा आयुक्तांना वाटते आहे, असे रेल्वेतील विश्वसनीय सूत्रांनी सांगितल़े
मुंबई मेट्रो रेल्वे
*मार्ग : वर्सोवा-अंधेरी-घाटकोपर
*एकूण १२ स्थानके, पाऊण ते एक तासांचा प्रवास अवघ्या वीस मिनिटांत
*प्रवासी क्षमता : ३७५ (चार डब्बे).
*सध्या १६ गाडय़ा ‘एमएमआरडीए’च्या ताब्यात
