मुंबई : मागील काही दिवस मुंबईत असह्य उकाडा सहन करावा लागत होता. मात्र मंगळवारी पहाटे गारव्यामुळे मुंबईकरांना काहीसा दिलासा मिळाला. दरम्यान, पुढील दोन – तीन दिवस तापमानातील घट कायम राहणार असल्याचा अंदाज हवामान विभागाने व्यक्त केला आहे.
हवामान विभागाच्या सांताक्रूझ केंद्रात मंगळवारी १५.२ अंश सेल्सिअस किमान तापमानाची नोंद झाली. सोमवारच्या तुलनेत तापमानात १.६ अंशानी कमी नोंदले गेले. तर कुलाबा केंद्रात १८.६ अंश सेल्सिअस किमान तापमानाची नोंद झाली. सोमवारच्या तुलनेत तापमान एक अंशाने कमी नोंदले गेले. पुढील दोन – तीन दिवस मुंबईतील किमान तापमानातील ही घट कायम राहणार असल्याचा अंदाज हवामान विभागाने व्यक्त केला आहे. अनेक भागात सोमवारपासून किमान तापमान २० अंशाखाली नोंदले जात आहे. काही भागात किमान तापमान ११ अंशाखाली नोंद झाली.
मुंबईत सोमवारी कमाल तापमानाच्या पाऱ्यात घसरण झाली होती. मात्र, मंगळवारी पुन्हा कमाल तापमानाचा पारा चढा होता. हवामान विभागाच्या कुलाबा केंद्रात ३०.२ अंश सेल्सिअस, तर सांताक्रूझ केंद्रात ३३.३ अंश सेल्सिअस कमाल तापमानाची नोंद झाली. सोमवारच्या तुलनेत कुलाबा येथे २.२ अंशानी अधिक कमाल तापमान नोंदले गेले. मात्र, मुंबईच्या किमान तापमानात घट झाल्यामुळे दिवसभर दिलासादायक वातावरण होते.
हेही वाचा – मुंबईत पीएम २.५ च्या पातळीत वाढ
हेही वाचा – प्रधानमंत्री मातृवंदना योजनेत ३५ लाख लाभार्थी!
उत्तरेकडील थंड वाऱ्यांच्या प्रवाहामुळे राज्यात थंडी जोर धरण्याची शक्यता आहे. राज्यातील किमान तापमानात पुढील दोन दिवसांत आणखी घट होण्याची शक्यता आहे. राज्यातील तापमानातही मागील दोन दिवसांपासून चढ -उतार सुरू आहेत. जळगाव येथे मंगळावारी सर्वात कमी ८.८ अंश सेल्सिअस किमान तापमानाची नोंद झाली.
