मुंबई : मुंबई महापालिकेने ४ एप्रिलपासून मुंबईतील क्लीन अप मार्शलची सेवा बंद करण्याचा निर्णय घेतला आहे. मात्र त्यानंतरही क्लीन अप मार्शल रस्त्यावर दिसले किंवा त्यांनी मुंबईकरांना दंड लावून पैसे उकळण्याचा प्रयत्न केला तर त्याची तक्रार विभाग कार्यालयाकडे करावी, असे आवाहन मुंबई महापालिकेने केले आहे.
मुंबई महानगरपालिकेच्या घनकचरा व्यवस्थापन विभागाने ‘स्वच्छ मुंबई अभियान’अंतर्गत मुंबईत नेमलेल्या क्लीन अप मार्शलची सेवा येत्या ४ एप्रिलपासून खंडित करण्याचा निर्णय घेतला आहे. मुंबई महापालिका आयुक्त भूषण गगराणी यांनी तसे निर्देश पालिका प्रशासनाला दिले आहेत. मात्र ४ एप्रिलनंतर या ‘क्लीन अप मार्शल’कडून दंड आकारणी होत असल्यास नागरिकांनी संबंधित प्रशासकीय विभागाशी (वॉर्ड ऑफिस) संपर्क साधावा, असे आवाहनही महानगरपालिका प्रशासनाने केले आहे.
परिसर अस्वच्छ करणाऱ्या नागरिकांना दंड लावण्यासाठी मुंबई महानगरपालिकेने मुंबईतील सर्व २४ प्रशासकीय विभागांमध्ये क्लीन अप मार्शल नियुक्त केले होते. प्रत्येक प्रशासकीय विभागात विविध १२ संस्थांमार्फत प्रत्येकी ३० क्लीन अप मार्शलची नियुक्ती करण्यात आली होती. या योजनेच्या अंमलबजावणीचे नियम व तत्वे देखील ठरवून देण्यात आले होते. मात्र मार्शलनी विविध नियमांचा भंग केल्याच्या अनेक तक्रारी मुंबई महापालिका प्रशासनाकडे आल्या होत्या. त्यामुळे मुंबईत स्वच्छतेसाठी नेमण्यात आलेल्या क्लीन अप मार्शलच्या संस्थांचा करार ४ एप्रिलपासून रद्द करण्यात येणार आहे. मात्र ‘स्वच्छ मुंबई अभियाना’च्या अंमलबजावणीचे काम सुरू राहणार आहे. त्यासाठी महानगरपालिकेकडून लवकरच कार्यवाही करण्यात येणार असल्याचे उप आयुक्त (घनकचरा व्यवस्थापन) किरण दिघावकर यांनी सांगितले.
क्लीन अप मार्शल विरोधात या तक्रारी
महानगरपालिकेच्या प्रशासकीय विभागांनी कळविलेल्या ठिकाणी न जाणे, करारात बांधकाम सुरू असलेल्या ठिकाणी कारवाई करणे अपेक्षित नसतानाही अशा ठिकाणी मार्शल प्रतिनिधींचे सातत्याने जाणे, आठवड्याचे सातही दिवस आणि २४ तास पाहणी अपेक्षित असताना मार्शल अनेकदा गैरहजर असल्याचे निदर्शनास येणे, बायोमेट्रीक हजेरीबाबत उदासीनता, नियमभंग करणाऱ्या नागरिकांकडून दंडाच्या रकमेपेक्षा जास्त रक्कम आकारणे, आपल्या कक्षेबाहेरील परिसरात जाऊन पाहणी करणे, हॉटेल्स, बँक्वेट हॉल तसेच होर्डिंग आणि फलक आदी बाबी करारात नसतानाही तेथून दंड आकारणे यासह करारपत्रानुसार अटी व शर्थींचे पालन न करणे आदी बाबी महानगरपालिका प्रशासनाच्या निदर्शनास आल्या आहेत. तसेच, गत वर्षभरात क्लीन अप मार्शलच्या असभ्य वर्तवणुकीमुळे महानगरपालिकेच्या प्रतिमेलाही धक्का बसत होता.