मुंबई : मुंबई महानगरपालिकेने गेल्या आर्थिक वर्षात ६,१९८ कोटी रुपये मालमत्ता कर वसूल केला आहे. मालमत्ता कर संकलनाचे आजवरचे सर्व विक्रम मोडीत निघाले आहेत. सन २०२४-२५ या आर्थिक वर्षासाठी निर्धारित करण्यात आलेल्या ६ हजार २०० कोटी रुपयांच्या उद्दिष्टाच्या तुलनेत महानगरपालिकेने ६ हजार १९८ कोटी ०५ लाख रुपये इतके म्हणजेच ९९.९७ टक्के मालमत्ता कराचे संकलन केले आहे. तसेच, अतिरिक्त दंडाच्या स्वरुपात अधिकचे १७८ कोटी ३९ लाख रुपयेही यंदा संकलित करण्यात आले आहेत.
पालिका प्रशासनाने २०२४-२५ या आर्थिक वर्षात मालमत्ता करातून ६२०० कोटींचे उत्पन्न मिळेल असे गृहीत धरले होते. वर्षाच्या सुरुवातीला पालिकेने ४९५० कोटी रुपये उत्पन्न गृहीत धरले होते. मात्र नंतर हे उद्दीष्ट वाढवून ६२०० कोटी रुपये करण्यात आले होते. अखेर हे उद्दीष्ट पालिकेच्या यंत्रणेने गाठले.
करनिर्धारण व संकलन विभागाच्या वतीने मालमत्ता कर संकलनासाठी सातत्यपूर्ण प्रयत्न करण्यात आले होते. नागरिकांनी वेळेवर मालमत्ता करभरणा करावा, यासाठी जनजागृती करणे; निर्धारित कालावधीत नागरिकांना मालमत्ता कराचा भरणा करता यावा यासाठी साप्ताहिक, तसेच सार्वजनिक सुटीच्या दिवशी नागरी सुविधा केंद्र सुरू ठेवणे; करभरणा करण्यासाठी ऑनलाइन सुविधा उपलब्ध करून देणे; मोठ्या थकबाकीदारांवर लक्ष केंद्रित करणे, तसेच मागील थकबाकी वसुलीसाठी पाठपुरावा करणे, आदी प्रयत्नांचा यामध्ये समावेश होता.
सर्वाधिक मालमत्ता कर वरळीतून
सर्वाधिक मालमत्ता कर वसुली वरळी प्रभादेवी परिसरातून झाली आहे. त्याखालोखाल अंधेरी पूर्व, वांद्रे पूर्व, अंधेरी पश्चिम या विभागांनी मालमत्ता कर भरला आहे.
वरळी, प्रभादेवी – जी दक्षिण – ६२४ कोटी ५० लाख रुपये
अंधेरी, जोगेश्वरी पूर्व – के पूर्व – ५६८ कोटी ५६ लाख रुपये
वांद्रे, सांताक्रूझ, खार पूर्व – एच पूर्व – ५२६ कोटी ६४ लाख रुपये
अंधेरी, जोगेश्वरी पश्चिम – के पश्चिम – .५०५ कोटी रुपये
पश्चिम उपनगराचा मालमत्ता करामध्ये मोठा वाटा
एकूण जमा झालेल्या मालमत्ता करापैकी सुमारे ५० टक्के मालमत्ता कर हा पश्चिम उपनगरातून जमा झाला आहे.
शहर विभाग – १ हजार ९३३ कोटी २६ लाख रुपये
पश्चिम उपनगरे – ३ हजार ०३८ कोटी ४९ लाख रुपये
पूर्व उपनगरे – १ हजार २१८ कोटी ७९ लाख रुपये
