मुंबई : धर्मवीर, स्वराज्यरक्षक छत्रपती संभाजी महाराज मार्गावरील (कोस्टल रोड) नव्या मार्गिका वाहतुकीसाठी खुल्या होत असताना पोलिसांनीही तेथील वाहतुकीत बदल केले आहेत. मुंबई वाहतूक पोलिसांनी याबाबतचे आदेश शनिवारी जारी केले.
कोस्टल रोडच्या उत्तर वाहिनी मार्गावर मरिन ड्राईव्ह (प्रिन्सेस स्ट्रीट ब्रिज) / वत्सलाबाई देसाई चौक (हाजीअली जंक्शन) / लाला लजपतराय कॉलेज / बिंदूमाधव ठाकरे जंक्शन मार्गे वांद्रे टोल प्लाझाकडे जाणारी वाहतूक, तसेच वरळी कोळीवाडा – प्रभादेवीकडे जाणारी उत्तर वाहिनी सकाळी ७ ते रात्री १२ वाजेपर्यत सुरू राहील आणि रात्री १२ ते सकाळी ७ वाजेपर्यंत वाहतुकीसाठी बंद राहील.
हेही वाचा…रवींद्र सिंगल, दत्तात्रय कराळे यांना राष्ट्रपती पदक, महाराष्ट्र पोलीस दलाला एकूण ४३ पदके
वांद्रे टोल प्लाझाकडून कोस्टल रोड कनेक्टर पुलाद्वारे मरिन ड्राईव्ह (प्रिन्सेस स्ट्रीट ब्रिज) / वत्सलाबाई देसाई चौक (हाजीअली जंक्शन) जाणारी दक्षिण वाहिनी सकाळी ७ पासून रात्री १२ पर्यंत सुरू राहील. तसेच बिंदूमाधव ठाकरे जंक्शनकडून सी लिंक गेटद्वारा वांद्रे टोल प्लाझाकडे जाणारी उत्तर वाहिनी सकाळी ७ पासून रात्री १२ पर्यंत वाहतुकीसाठी बंद राहील. हा बदल २७ जानेवारीपासून सकाळी ७ पासून पुढील निर्णय येईपर्यंत अंमलात राहणार आहे. कोस्टल रोड कनेक्टर पूल ८० किमी, वळणाच्या ठिकाणी ४० किमी व कोस्ट रोड उतरणीवर ३० किमी वेग मर्यांदेचे निर्बंध घालण्यात आले आहे. याबाबतचे आदेश वाहतूक पोलिसांकडून जारी करण्यात आले आहेत.
