मुंबई : सर्वाधिक खड्ड्यांच्या यादीत मुंबई उपनगर अग्रेसर; या भागातून सर्वाधिक तक्रारी

मुंबई : या पावसाळ्यात मुंबईतील खड्ड्यांबाबत आलेल्या एकूण तक्रारींपैकी सर्वाधिक तक्रारी पश्चिम उपनगरातून आल्या आहेत. यावर्षी पालिकेच्या रस्ते विभागाने एकूण ३४,३९२ खड्डे बुजवले असून त्यातील सर्वाधिक खड्डे हे अंधेरी ते मालाड परिसरातील आहेत. खड्ड्यावरून न्यायालयाने पालिकेला फटकरल्यानंतर पालिकेने खड्ड्याबाबतचा अहवाल तयार केला असून त्यातून ही माहिती पुढे आली आहे. एकूण खड्डयांपैकी सर्वाधिक खड्डे हे अंधेरी जोगेश्वरीच्या पूर्व भागातील आहेत. या भागातून २९६३ तक्रारी आल्या. मालाडमधून २७०९ आणि अंधेरी जोगेश्वरीच्या पश्चिम भागातून २४३२ तक्रारी आल्या. एकूण तक्रारींपैकी पश्चिम उपनगरातून खड्ड्यांच्या १६,१७० तक्रारी आल्या. त्या तुलनेत पूर्व उपनगरातून  ७८८५ तक्रारी रहिवाशांनी केल्या तर शहर भागातून १०,३३७ तक्रारी आल्या.