मुंबईत एटीएम व्हॅनमधील रोकड लुटण्याचा प्रयत्न

सध्या देशभरात सुरू असलेल्या अभुतपूर्व चलनटंचाईच्या पार्श्वभूमीवर बुधवारी मुंबईत एटीएम व्हॅनवर दरोडा टाकण्याचा प्रयत्न झाला. वांद्रे परिसरात दोन अज्ञात इसमांनी ही व्हॅन लुटण्याचा प्रयत्न केला. आयसीआयसीआय बँकेच्या पाली नाका एटीएमजवळ हा प्रकार घडला. मात्र एटीएमच्या सुरक्षा रक्षकाच्या प्रसंगावधनामुळे हा प्रयत्न फसला.
यावेळी अज्ञात व्यक्तींनी सुरक्षारक्षकाला चाकूचा धाक दाखवला. मात्र, सुरक्षारक्षकाने चपळाईने बंदूक बाहेर काढल्याने या दोन्ही दरोडेखोरांनी तेथून पळ काढला. त्यानंतर सुरक्षारक्षकाने या घटनेची माहिती पोलिसांना दिली. पोलिसांनी या व्यक्तींचा शोध सुरू केला असून अद्याप आरोपींची ओळख पटू शकलेली नाही.नोटांबदीच्या पार्श्वभूमीवर या घटनेला वेगळे महत्त्वा प्राप्त झाले आहे. याप्रकरणी वांद्रे पोलीस ठाण्यात गुन्हा दाखल करण्यात आला असून दोघांचा शोध सुरु आहे.