मुंबई विद्यापीठाची अधिसभा १५ मिनिटांसाठी तहकूब; युवा सेना आणि ‘बुक्टु’च्या अधिसभा सदस्यांचे आंदोलन

‘मुंबई विद्यापीठाच्या शैक्षणिक वर्ष २०२५-२६ साठीच्या अर्थसंकल्पाचा मुद्दा व्यवस्थापन परिषदेच्या बैठकीच्या अजेंड्यात नव्हता. अजेंड्यावर मुद्दा नाही मग, तो मंजूर होण्याचा मुद्दाच येत नाही. नियमानुसार अर्थसंकल्पाचा मसुदा हा व्यवस्थापन परिषदेच्या बैठकीत मंजूर होणे आवश्यक आहे आणि त्यानंतर सदर अर्थसंकल्प हा अर्थसंकल्पीय अधिसभेच्या वार्षिक बैठकीत सादर करण्यात येतो. मात्र अर्थसंकल्पाचा मसुदा हा व्यवस्थापन परिषदेच्या बैठकीत मंजूर झालेला नाही आणि तरीही हा अर्थसंकल्प अधिसभेच्या वार्षिक बैठकीत सादर करण्यात आल्यास ही नियमांची पायमल्ली ठरेल. या कारभाराविरोधात दाद मागण्यासाठी आम्ही कुलपती तथा राज्यपाल सी. पी. राधाकृष्णन यांच्याकडे जाऊ’, अशी भूमिका ठाकरे गटाच्या युवा सेनेच्या अधिसभा व व्यवस्थापन परिषद सदस्य शीतल देवरुखकर – शेठ यांनी मांडत संताप व्यक्त केला. यानंतर ठाकरे गटाच्या युवा सेनेचे १० आणि ‘बुक्टु’च्या ८ अधिसभा सदस्यांनी सभागृहाच्या वेलमध्ये प्रवेश करीत आंदोलन करीत घोषणाबाजीने सभागृह दणाणून सोडले आहे.

दरम्यान, ‘मुंबई विद्यापीठाचा व्यवस्थापन परिषदेच्या बैठकीत शैक्षणिक वर्ष २०२५-२६ साठीच्या अर्थसंकल्पाचा मसुदा मंजूर करून सदर अर्थसंकल्प हा अर्थसंकल्पीय अधिसभेच्या वार्षिक बैठकीत आणलेला आहे. कोणत्याही नियमांचे उल्लंघन झालेले नाही’, असे मुंबई विद्यापीठाचे प्र – कुलगुरू डॉ. अजय भामरे यांनी अधिसभेत सांगितले.