मुंबई : मुंबई विद्यापीठाने शैक्षणिक वर्ष २०२३-२४ अंतर्गत एप्रिल २०२४ मध्ये घेतलेल्या उन्हाळी सत्रातील तृतीय वर्ष ‘बी.ए.’च्या सहाव्या सत्र परीक्षेचा निकाल शुक्रवारी जाहीर केला. या परीक्षेत ४९.३१ टक्के म्हणजे ४ हजार ६७५ विद्यार्थी उत्तीर्ण आणि ५०.६९ टक्के म्हणजेच ४ हजार ८०६ विद्यार्थी अनुत्तीर्ण झाले आहेत. हा निकाल विद्यापीठाने निर्धारित वेळेत म्हणजेच ३० दिवसांच्या आत जाहीर केला आहे. हेही वाचा : मुंबई: ‘अभियांत्रिकी’ सत्र ८ आणि ‘बीएमएस’ सत्र २ अभ्यासक्रमांच्या परीक्षा पुढे ढकलल्या मुंबई विद्यापीठाच्या ‘बी.ए.’ अभ्यासक्रमाच्या तृतीय वर्ष सहाव्या सत्र परीक्षेसाठी एकूण १३ हजार ३०१ विद्यार्थ्यांनी नोंदणी केली होती. त्यापैकी १२ हजार ६९७ विद्यार्थ्यांनी परीक्षा दिली आणि ४ हजार ६७५ विद्यार्थी उत्तीर्ण व ४ हजार ८०६ विद्यार्थी अनुत्तीर्ण झाले. तर ६०४ विद्यार्थी हे परीक्षेला अनुपस्थित होते. दरम्यान, ४५ विद्यार्थ्यांचे निकाल हे गैरप्रकरणामुळे (कॉपी) राखीव ठेवण्यात आले आहेत. तर २ हजार २४३ विद्यार्थ्यांचे निकाल ते प्रथम किंवा द्वितीय वर्ष उत्तीर्ण नसल्याने राखीव ठेवण्यात आले आहेत. तसेच विविध कारणास्तव प्रवेश निश्चित न झाल्यामुळे ९२८ विद्यार्थ्यांचे निकाल राखीव ठेवण्यात आले आहेत, अशी माहिती मुंबई विद्यापीठाच्या परीक्षा व मूल्यमापन मंडळाने दिली. विद्यापीठाने आतापर्यंत २०२४ च्या उन्हाळी सत्रातील विविध ७४ परीक्षांचे निकाल जाहीर केले आहेत. विद्यार्थ्यांना सदर निकाल विद्यापीठाच्या या अधिकृत संकेतस्थळावर पाहता येईल.
