मुंबई : मागील काही दिवसांपासून मुंबईमधील तापमानात सातत्याने वाढ होत असून वाढत्या उन्हामुळे मुंबईकर घामांच्या धारांनी हैराण झाले आहेत. घामामुळे नागरिकांना त्वचाविकाराचा त्रास सहन करावा लागत आहे. मागील महिनाभरामध्ये नागरिक बुरशीजन्य व जीवाणूजन्य आजाराने त्रस्त झाले असून, त्वचाविकारांच्या रुग्णांच्या संख्येत सुमारे ३० टक्क्यांनी वाढ झाली आहे.
दरवर्षी उन्हाळ्यात घामामुळे नागरिकांना त्वचाविकार होण्याचे प्रमाण वाढत आहे. मात्र मागील काही दिवसांपासून मुंबईसह राज्यामध्ये तापमानात मोठ्या प्रमाणात वाढ झाली आहे. वाढत्या तापमानामुळे अनेकांना उष्माघाताचा त्रास होत आहे. त्याचबरोबर नागरिकांना त्वचारोगांचाही सामना करावा लागत आहे. बुरशीजन्य व जीवाणूजन्य विकारांचे प्रमाणही मोठ्या प्रमाणावर वाढत आहे. नागरिकांच्या अंगावर लाल रंगाचे पुरळ येण्याबराेबरच कमरेवर, जांघेमध्ये, काखेमध्ये, हात व पायावर घामोळे व पुरळ येण्याचे प्रमाण वाढले आहे. मागील महिनाभरामध्ये या रुग्णांच्या संख्येत ३० ते ३५ टक्क्यांनी वाढ झाली आहे. मुंबईतील नागरिक जीन्ससारखे कपडे घालत असल्याने त्यांना मोठ्या प्रमाणावर बुरशीजन्य विकार होत आहे. वाढत्या तापमानामुळे सनबर्न होण्याचे प्रमाणही वाढल्याची माहिती ज्येष्ठ त्वचाविकार तज्ज्ञ डॉ. तुषार जगताप यांनी दिली.
प्रचंड उष्णतेमुळे नागरिकांच्या शरीरातून मोठ्या प्रमाणात घाम येतो. हा घाम शरीरावर साचून राहिल्याने घाणेंद्रिये बंद होतात. घाणेंद्रिये रोजच्या रोज पाण्याने स्वच्छ न केल्यास त्वचेचे विकार होण्यास सुरुवात होते. मुंबईमधील वाढत्या तापमानामुळे शरीरातून निघणाऱ्या घामामुळे नागरिक हैराण झाले आहेत. घामामुळे निर्माण होणाऱ्या त्वचाविकाराच्या रुग्णांच्या संख्येत जानेवारीच्या तुलनेत एप्रिलमध्ये वाढ झाली आहे. प्रामुख्याने बुरशीजन्य रोग, घामोळे आणि उबाळू आलेल्या रुग्णांची संख्या अधिक असल्याची माहिती जे. जे. रुग्णालयातील त्वचाविकार विभागातील डॉक्टरानी दिली.
एप्रिल महिन्याच्या सुरुवातीपासून घामोळे, उबाळू, बुरशीजन्य रोग, खाज, पुरळ यांसारखे त्वचेसंदर्भातील रोग नागरिकांना होण्याचे प्रमाण वाढले आहे. महिनाभरामध्ये या रोगांच्या रुग्णांमध्ये साधारणपणे ३० टक्क्यांपर्यंत वाढ झाल्याची माहिती सेंट जॉर्जेस रुग्णालयाचे वैद्यकीय अधीक्षक डॉ. विनायक सावर्डेकर यांनी दिली.
लहान मुलांच्या अंगावर सफेद डाग वाढलेत
लहान मुले सतत उन्हात खेळत असल्याने त्यांना प्रचंड घाम येतो. त्यामुळे त्यांच्या अंगावर सफेद डाग दिसत आहेत. हे डाग साधारणपणे मानेवर किंवा चेहऱ्यावर जास्त प्रमाणात दिसतात. मात्र काही वर्षांपासून ते पाठीवर दिसू लागले आहेत. तसेच तरुणांच्या चेहऱ्यावर तारुण्यपिटिका वाढण्याचे प्रमाणातही वाढ झाल्याचे डॉ. तुषार जगताप यांनी सांगितले.
शिबळ्यांचे प्रमाण वाढलेय
वाढत्या उन्हामुळे येणाऱ्या घामामुळे अंगातील तेलकटपणा वाढत असल्याने शिबळे येण्याच्या प्रमाणात २५ ते ३० टक्क्यांनी वाढ झाली आहे. पुढील काही दिवसांमध्ये तापमानात वाढ होणार असल्याने शिबळे येण्याच्या रुग्णांच्या संख्येत वाढ होण्याची शक्यता त्वचाविकार तज्ज्ञांनी व्यक्त केली आहे.
काय काळजी घ्याल
जास्तीत जास्त पाणी प्या.
घाम सतत येत असल्याने दिवसांतून दोन वेळा साध्या पाण्याने अंघोळ करा.
अंघोळ शक्य नसेल तर ओल्या कपड्याने शरीर चांगले पुसून काढा.
नियमित डस्टिंग पावडरचा वापर करावा.
सतत घाम येणाऱ्या जागेवर डस्टिंग पावडर लावावी.
सफेद, सुती व सैल कपड्यांचा वापर करावा.
कलिंगड, टरबूज यासारखी फळे खाण्यास प्राधान्य द्यावे.
