मिठी नदीतील गाळ काढण्याच्या निविदेतील आरोप तथ्यहीन, महानगरपालिका प्रशासनाचा दावा

मिठी नदीतील गाळ काढण्याच्या कामात घोटाळा झाल्याच्या आरोपाखाली आर्थिक गुन्हे शाखेच्या विशेष तपास पथकाकडून (एसआयटी) चौकशी सुरू आहे. त्यातच आता आणखी एक घोटाळा केला जात असल्याचा आरोप परब यांनी आपल्या पत्रातून केला आहे. गेल्या दोन दशकांपासून सुरू असलेल्या मिठी नदीतील गाळ काढण्याच्या प्रकल्पात कथित अनियमितता आणि निधीचा गैरवापर झाल्याच्या आरोपांप्रकरणी नुकतीच आर्थिक गुन्हे शाखेच्या विशेष तपास पथकाने चौकशी सुरु केली आहे. त्यातच परब यांनी आता आणखी आरोप केल्यामुळे पालिका प्रशासनाच्या कारभारावर टीका होऊ लागली आहे. मात्र, महानगरपालिका प्रशासनाने सर्व आरोप फेटाळून लावले आहेत. मिठी नदीचे पात्र अनेक ठिकाणी अतिशय रुंद आहे. त्यामुळे नदीतून गाळ काढण्यासाठी ३५ मीटर लांब बूम तसेच १.५ क्यूबिक मीटर क्षमतेची बकेट असणारे पोकलेन मशीन तैनात करण्याची अट निविदेत समाविष्ट करण्यात आली आहे. जेणेकरून मिठी नदीतून गाळ काढण्याचे काम प्रभावीपणे करता येऊ शकेल. मात्र, संबंधित निविदा प्रक्रिया अद्याप अंतिम झालेली नाही, असे महापालिकेने स्पष्ट केले आहे.

गाळ काढण्याच्या निविदा प्रक्रियेत घोटोळा झाल्याचा आरोप करून काही निविदाकारांनी मुंबई उच्च न्यायालयात याचिका दाखल केली होती. त्या याचिकाकर्त्यांनी निविदा प्रक्रियेला आव्हान दिले आहे. त्यामुळे ही बाब तूर्तास न्यायप्रविष्ट आहे. या प्रकरणावरील पुढील सुनावणी ४ मार्च २०२५ रोजी होणार आहे. उच्च न्यायालयाच्या आदेशान्वये याबाबत महानगरपालिका प्रशासन पुढील कार्यवाही करणार असल्याची माहिती पालिकेने दिली आहे.