कोकणातील धूमशानमुळे भुजबळांची कोंडी!

काँग्रेसचे रत्नागिरी-सिंधुदुर्गमधील उमेदवार निलेश राणे यांच्या विरोधात काम करण्याचा राष्ट्रवादी काँग्रेसच्या स्थानिक नेत्यांच्या निर्णयामुळे काँग्रेस व राष्ट्रवादी काँग्रेसमध्ये निर्माण झालेल्या तणावाचा फटका आता नाशिकमधील राष्ट्रवादीचे उमेदवार छगन भुजबळ यांना बसता आहे. राणे यांचे कट्टर समर्थक समजले जाणारे माणिकराव कोकाटे यांच्या गटाने उघडपणे भुजबळांविरोधात काम सुरू केले आहे.
सिंधुदुर्गातील काँग्रेस-राष्ट्रवादीमधील या राडय़ाचे पडसाद राज्यात इतरत्र उमटू लागले आहेत. नाशिक मतदारसंघात सिन्नर येथील राष्ट्रवादी काँग्रेसचे उमेदवार छगन भुजबळ यांच्या सभास्थानीच काँग्रेस कार्यकर्त्यांनी आपल्या क्षोभाला वाट करून दिली. भुजबळ यांच्या विरोधात स्थानिक काँग्रेस कार्यकर्त्यांमध्ये खदखदत असलेल्या नाराजीला सिधुदुर्ग मतदारसंघातील घडामोडींचे निमित्त मिळाले असून राणे पितापुत्रांच्या विरोधात राष्ट्रवादीने घेतलेल्या भूमिकेची परतफेड करण्यासाठीच सिन्नरमध्ये काँग्रेसने संधी साधून राष्ट्रवादीविरोधी पाऊल उचलल्याचे मानले जात आहे. सिन्नर येथे आयोजित सभेत काँग्रेसच्या कार्यकर्त्यांनी जोरदार घोषणाबाजी करीत भुजबळ विरोधाला वाट करून दिल्याने, या सभेकडे पाठ फिरविण्याची पाळी भुजबळ यांच्यावर आली. एकत्र निवडणूक लढविणाऱ्या काँग्रेस व राष्ट्रवादीच्या ऐन निवडणुकीच्या रणधुमाळीतच या मतभेदांनी तोंड वरकाढल्याने, उभय पक्षांची पंचाईत झाली आहे. दरम्यान, काँग्रेस उमेदवार आणि उद्योगमंत्री नारायण राणे यांचे पुत्र निलेश राणे यांच्या सिंधुदुर्ग-रत्नागिरी मतदारसंघातील काँग्रेसराष्ट्र वादीमधील संघर्ष शरद पवार यांच्या कानपिचक्यांनंतर अधिकच चिघळला आहे. संवेदनशील बनू लागलेल्या या मतदारसंघाला पोलीस आणि सुरक्षा यंत्रणांचा वेढा पडला आहे. दोन्ही जिल्ह्य़ांत पाच हजार पोलीस, रेल्वे सुरक्षा दलाचे व राखीव पोलीस दलाचे जवान आणि गृहरक्षक दलाचे जवान तैनात करण्यात आले आहेत. रिाणे यांच्या विरोधात उभे ठाकलेले राष्ट्रवादी काँग्रेसचे आमदार दीपक केसरकर यांना सशस्त्र पोलिसांचे विशेष संरक्षण पुरविण्यात आले असून मतदारसंघात तणावपूर्ण शांतता अनुभवास येत आहे.