नवाब मलिकांविरोधात समीर वानखेडेंची अनुसूचित जाती आयोगाकडे धाव! त्रास दिला जात असल्याची केली तक्रार!

राष्ट्रवादी काँग्रेसचे प्रवक्ते आणि राज्याचे अल्पसंख्याक मंत्री नवाब मलिक यांनी समीर वानखेडेंवर गंभीर आरोप केले आहेत. नागरी सेवा परीक्षा उत्तीर्ण करण्यासाठी समीर वानखेंडेंनी मुस्लीम असून देखील अनुसूचित जातींसाठी असलेल्या आरक्षणाचा लाभ घेतल्याचा आरोप नवाब मलिक यांनी केला आहे. याच मुद्द्यावरून गेल्या काही दिवसांपासून राज्यात आरोप-प्रत्यारोप सुरू असून समीर वानखेडे मुस्लीम आहेत किंवा नाहीत, यावरून दोन्ही बाजूंन दावे-प्रतिदावे केले जात आहेत.

एकीकडे समीर वानखेडे आणि त्यांच्या कुटुंबीयांकडून हिंदूच असल्याचा दावा केला जात आहे. यामध्ये स्वत: समीर वानखेडे, त्यांची पत्नी अभिनेत्री क्रांती रेडकर आणि समीर वानखेडेंचे वडील ज्ञानदेव वानखेडे यांनी सातत्याने मुस्लीम असल्याचे दावे खोडून काढले आहेत. मात्र, दुसरीकडे समीर वानखेडे यांच्या पहिल्या पत्नीचे वडील आणि त्यांचा पहिला निकाहनामा पढणारे काझी यांनी ते मुस्लीमच असल्याचा दावा केला आहे. त्यामुळे या प्रकरणावरून मोठा वाद सुरू झाला आहे.