न्यू इंडिया को ऑपरेटिव्ह बँकेतील १२२ कोटींचा अपहार : १५ कोटी रुपये स्वीकारणाऱ्या संशयीताला अटक

न्यू इंडिया को ऑपरेटिव्ह बँकेचे महाव्यवस्थापक हितेश मेहता याने इतर आरोपींसह कट रचून प्रभादेवी व गोरेगाव शाखेच्या तिजोरीमधील १२२ कोटी रुपयांचा अपहार केल्याचा आरोप आहे. त्यातील १५ कोटी रुपये अटक आरोेपी मनोहर अरूणाचलम याने वडिलांच्या उपस्थितीत मेहताकडून स्वीकारले होते. हा व्यवहार २०१९ मध्ये झाला होता. सौरऊर्जा यंत्रणा पुरवणारे व्यवसायिक उन्ननाथन अरूणाचलम ऊर्फ अरूणभाई यालाही ४० कोटी रुपये दिल्याचे चौकशीत हितेशने सांगितले होते. पण १५ फेब्रुवारीला याप्रकरणी दादर पोलीस ठाण्यात गुन्हा दाखल झाल्यानंतर अरूणभाई व त्यांचा मुलगा मनोहर दोघेही पळाले होते. आरोपीने मनोहरला पळण्यात मदत केली. याशिवाय त्याला लपण्यासाठी विविध व्यक्तींशी संपर्क साधून मदत मागितली असे चौकशीत निष्पन्न झाले. अखेर मनोहरला गुरूवारी अटक करण्यात आली. त्याला शुक्रवारी न्यायालयापुढे हजर करण्यात येणार आहे. अरूण भाई याने दोन संस्थांमध्ये रक्कम गुंतवणूक करण्याचे आश्वासन दिल्याचे मेहताने चौकशीत सांगितले होते. याप्रकरणी अरूणभाईविरोधात आर्थिक गुन्हे शाखेने लुक आऊट सर्क्युलर जारी केले आहे.

याप्रकरणी प्रभारी मुख्य कार्यकारी अधिकारी देवर्षी घोष यांच्या तक्रारीवरून दादर पोलिसांनी भारतीय न्याय संहिता कलम ३१६ (५), ६१ (२) अंतर्गत गुन्हा दाखल केला होता. त्यात १२२ कोटी रुपयांचा अपहार केल्याप्रकरणी बँकेचा महाव्यवस्थापक हितेश मेहता याला आर्थिक गुन्हे शाखेने अटक केली. मेहताकडून मिळालेल्या माहितीच्या आधारे बांधकाम व्यावसायिक धर्मेश पौन याला पोलिसांनी अटक केली. अपहाराच्या रक्कमेतील ७० कोटी रुपये मेहताने पौनला दिल्याचा संशय आहे. गैरव्यवहार सुरू असतानाही त्याकडे दुर्लक्ष करणारे बँकेचे माजी मुख्य कार्यकारी अधिकारी (सीईओ) अभिमन्यू सुरेंदर भोअन यांनाही आर्थिक गुन्हे शाखेने अटक केली होती. त्यानंतर आता याप्रकरणी चौथा आरोपी मनोहर अरूणाचलम याला अटक करण्यात आली आहे.