अपात्रतेच्या नोटिशींचा सत्तेतील सहभागाशी संबंध नाही, प्रदेशाध्यक्ष सुनील तटकरे यांचा निर्वाळा

महाराष्ट्राच्या विकासाचा ‘अजेंडा’ हाती घेऊन राष्ट्रवादी काँग्रेस पक्ष सत्तेत सहभागी झाला आहे. सत्तेच्या माध्यमातून राज्यातील शेतकरी, शेतमजूर, कष्टकरी, बेरोजगार आदींना न्याय देण्यासाठी तसेच महिला-मुलींच्या सुरक्षिततेला प्राधान्य देण्यासाठी आम्ही कटिबद्ध आहोत. त्यासाठी आगामी काळात आम्ही सत्तेचा उपयोग करू असे तटकरे यांनी स्पष्ट केले. भाजपबरोबर सत्तेत सामील झालेले आणि त्यांच्यासोबत असलेल्या सर्वाना जितेंद्र आव्हाड यांनी परत येण्याचे आवाहन केले होते. त्यावर आव्हाड हे कोण आहेत? असा सवाल करीत त्यांच्या आवाहनाला आम्ही महत्त्व द्यायचे काहीच कारण नाही, असे रोखठोक सांगितले.

अजित पवार हे राज्यातील एक सक्षम नेतृत्व आहे. त्यांच्यात मुख्यमंत्र पद सांभाळण्याची क्षमता आहे. ते योग्य वेळी मुख्यमंत्री होतील. मात्र पवार यांना मुख्यमंत्री करण्यासाठी १६ आमदारांना अपात्र करण्यासंदर्भातील कार्यवाही सुरू असल्याची चर्चा बिनबुडाची आहे. या चर्चेला काही अर्थ नाही. आपणांस ही माहिती आहे की विधानसभा अध्यक्ष राहुल नार्वेकर यानी शिवसेनेच्या आमदारांना पाठवलेल्या नोटिसा ह्या सर्वोच्च न्यायालयाने दिलेल्या निकालाचा भाग आहे.