मुंबईकरांना दिलासा! ओला चालकांचा संप मिटला

आज बुधवारी ओला कंपनीच्या अधिकाऱ्यांसोबत अंधेरीमध्ये बैठक झाली. उद्या उबरच्या अधिकाऱ्यांबरोबर बैठक होणार आहे असे मनसेच्या वाहतूक शाखेचे अध्यक्ष संजय नाईक यांनी सांगितले. या संपात मुंबईतील ओला आणि उबरचे ९० ते ९५ टक्के चालक सहभागी झाले होते असे संजय नाईक यांनी सांगितले. अत्यंत कमी नफा मिळत असल्याच्या विरोधात हे चालक संपावर गेले आहेत. संपात सहभागी न होता गाडया काढणाऱ्या ओला-उबरवर दगडफेक केल्याचा आरोप त्यांनी फेटाळून लावला.

कारचे नुकसान केल्या प्रकरणी पोलिसांनी आतापर्यंत विविध भागातून १५ जणांना अटक केली आहे. मुंबई आणि पुण्यातील बहुसंख्य चालकांनी संपातून माघार घेतल्याचा दावा उबरने केला आहे. एकटया मुंबईमध्ये ४५ हजारपेक्षा जास्त अॅप बेस टॅक्सी चालतात असा अंदाज आहे. ओलाचे चालक आज मध्यरात्रीपासून कामावर परतणार असल्याने मुंबईकरांना दिलासा नक्कीच मिळेल. या संपामुळे रोजची ओला-उबरने कामावर जाणाऱ्यांची चांगलीच पंचाईत झाली आहे.