सीएसएमटी रेल्वे स्थानकात प्लॅटफॉर्म नंबर एकवर लोकल ट्रेनचा एक डबा घसरला आहे. पनवेल लोकल ही सीएसएसटी रेल्वे स्थानकात प्लटफॉर्म नंबर एक वरुन निघत असतांना ही घटना घडली. लोकल पुढे जाण्याऐवजी मागे आली आणि ती बफरला धडकली, त्यावेळी लोकलचा डबा घसरला. या घटनेची चौकशी करण्यात येईल, असे मध्य रेल्वेतील अधिकाऱ्यांनी स्पष्ट केले.
सीएसएमटी स्थानकातून सकाळी ९.३९ वाजता पनवेलच्या दिशेने निघालेल्या लोकलच्या मागील चौथ्या डब्याची दोन चाके रूळावरून घसरली. या लोकलला पुढे जाण्यासाठी सिग्नलही मिळाला होता. मात्र ही लोकल पुढे जाण्याऐवजी मागे आली आणि बफरला धडकली. यामुळे लोकल वा बफरचे कोणतेही नुकसान झाले नाही. तर प्रवासीही जखमी झाले नाहीत, अशी माहिती अधिकाऱ्यांनी दिली. अपघाताची माहिती मिळताच रेल्वे कर्मचाऱ्यांनी तातडीने घटनास्थळी धाव घेतली असून लोकलचा डबा पूर्ववत करण्याचे काम युद्धपातळीवर सुरु आहे.
सीएसएमटी रेल्वे स्थानकात हार्बर मार्गासाठी प्लॅटफॉर्म नंबर एक आणि दोन वरुन लोकल ट्रेन रवाना होत असतात. मात्र एका प्लॅटफॉर्मवरच ही दुर्घटना घडल्याने आता फक्त दुसरा आणि एकमेव रेल्वे प्लॅटफॉर्म हार्बर रेल्वे वाहतुकीसाठी उपलब्ध आहे. यामुळे हार्बर लोकल सेवा विस्कळीत झाली आहे.
सीएसएमटी रेल्वे स्थानकात हार्बर मार्गासाठी असलेल्या एकाच प्लॅटफॉर्मवरुन लोकल वाहतुक सुरु असल्याने सध्या सीएसएमटी ते गोरेगाव दरम्यानची लोकल सेवा बंद ठेण्यात आली आहे. हार्बर मार्गावरील प्रवाशांना हार्बरच्या तिकीट आणि पासावर सध्या कुर्ला ते सीएसएमटी दरम्यान मुख्य रेल्वे मार्गाने प्रवास करण्याची परवानगी देण्यात आली आहे.
