लोकसत्ता खास प्रतिनिधी
मुंबई : फेअर प्ले या बेटिंग ॲप प्रकरणात सक्तवसुली संचलनालयाने (ईडी) मुंबई व पुण्यातील १९ ठिकाणी शोध मोहीम राबवली. आयपीएल प्रसारणसह फेअरप्ले ॲपद्वारे २०२४ च्या लोकसभा निवडणुकीच्या निकालावरही सट्टेबाजी केल्याप्रकरणी ही कारवाई करण्यात आली. या शोध मोहिमेदरम्यान रोख, बँक खात्यातील रक्कम, डीमॅट खाते आणि महागडी घड्याळे अशी एकूण आठ कोटी रुपयांची मालमत्ता गोठवण्यात आली आहे. या कारवाईत गुन्ह्याशी संबंधित कागदपत्रांसह डिजिटल उपरणेही जप्त करण्यात आली आहेत.
महाराष्ट्र सायबर विभागाने स्वामित्त्व हक्क भंग केल्याप्रकरणी फेअर प्ले ॲपसह इतर आरोपींविरोधात गुन्हा दाखल केला होता. तक्रारदार वायकॉम १८ नेटवर्क कंपनीकडे इंडियन प्रीमियर लीग (आपीएल) सामन्यांच्या प्रसारणाचे हक्क होते. पण फेअर प्ले नावाच्या ॲपवर बेकायदेशिररित्या सामन्यांचे प्रसारण करण्यात आल्याचा आरोप आहे. त्याप्रकरणी ईडी तपास करीत आहे.
आणखी वाचा-पर्समध्ये राहील असेच पुस्तक महिलांना वाचायला आवडते – डॉ. नीलम गोऱ्हे
वायकॉम १८ कंपनीकडे आयपीएल सामन्यांच्या प्रसारणाचे हक्क आहेत. पण फेअर प्ले या ॲपवर सामान्यांचे बेकायदा प्रक्षेपण करण्यात आले. यावेळी सुमारे ४० चित्रपट कलाकारांनी या ॲपची जाहिरात केली. त्यामुळे डिजिटल स्वामित्त्व हक्कचा भंग झाल्याची तक्रार वायकॉम १८ ने महाराष्ट्र सायबर पोलिसांकडे केली होती. त्यामुळे तक्रारदार कंपनीचे १०० कोटी रुपयांहून अधिक नुकसान झाल्याचा आरोप आहे. स्वामित्त्व हक्क भंग केल्याप्रकरणी महाराष्ट्र सायबरने फेअर प्ले ॲपविरोधात गुन्हा दाखल केला होता. त्याप्रकरणाच्या आधारारावर ईडीनेही तपासाला सुरूवात केली होती.
फेअर प्लेने दुबई आणि कुराकाओ येथील विदेशी संस्थांमार्फत प्रसिद्ध व्यक्तींचे प्रतिनिधित्व करणाऱ्या भारतीय संस्थांसोबत करार केल्याचे ईडीच्या तपासात उघड झाले आहे. तसेच भारतीय संस्थांनी, कंपन्यांनी फेअरप्लेच्या जाहिरातीसाठी करार अंमलात आणण्यापूर्वी त्याबाबत कोणतीही योग्य काळजी घेतली नाही.
फेअर प्लेने विविध बनावट कागदपत्राद्वारे उघडण्यात आलेल्या बँक खात्यांद्वारे निधी गोळा केल्याचे ईडीच्या तपासात उघड झाले आहे. तसेच बनावट बँक खात्यातील रकमेटा वापर करून ऑनलाईन माध्यमाध्यमातून व्यवहार करण्यात आले. त्यासाठी औषध कंपन्यांच्या पावत्यांचा वापर करण्यात आला. हा निधी हाँगकाँग, चीन आणि दुबई येथील परदेशी बनावट कंपन्यांना पाठवण्यात आला आहे. त्यासाठी ४०० हून अधिक बँक खात्यांचा वापर करण्यात आला. त्या अनुषंगाने बुधवारी ईडीने मुंबई व पुण्यातील १९ ठिकाणी छापे टाकले असून याप्रकरणी अधिक तपास सुरू असल्याचे ईडीकडून सांगण्यात आले.
