मध्य रेल्वेचा परळ कारखाना बंद होणार?, ४७ एकर जागेत कोचिंग टर्मिनस उभारण्याचा प्रस्ताव

मध्य रेल्वेवर १८७९ साली वाफेवरील इंजिन तयार करण्यासाठी परळ कारखाना उभारण्यात आला होता. तर, परळ कारखान्यात डिझेल, विद्युत रेल्वे इंजिन, नॅरोगेज लोको तयार करण्यात येत असून त्यांची देखभाल-दुरुस्ती केली जाते. तसेच एलएचबी डब्यांच्या देखभाल-दुरुस्तीचे काम येथे केले जाते. मात्र मध्य रेल्वेने कोणतीही आवश्यकता नसताना, परळ कारखाना बंद करून त्या जागेवर टर्मिनस उभारणार आहे. सीएसएमटी, एलटीटी, दादर टर्मिनस असताना परळ टर्मिनसची आवश्यकता नाही. तर परळ कारखान्यातील मोठमोठय़ा यंत्रणा माटुंगा, सानपाडा येथे पाठवण्यात येणार आहेत.

तसेच वर्षांनुवर्षे कारखान्यात काम करीत असलेल्या सुमारे दोन हजार कुशल रेल्वे कर्मचाऱ्यांना बडनेरा, लातूर, रत्नागिरी येथील कारखान्यात पाठविण्यात येणार आहे. तसेच कारखान्यातील ब्रिटिशकालीन वास्तूंचे नुकसान होणार आहे. यासह या भागात ६०० रेल्वे कर्मचाऱ्यांची घरे असून त्यांना इतर ठिकाणी स्थलांतरित करण्यात येणार आहे. यासह अनेक झाडांची तोड करण्यात येणार आहे, असे  सेंट्रल रेल्वे मजदूर संघाचे सरचिटणीस प्रवीण वाजपेयी यांनी सांगितले.

सध्या सीएसएमटी, दादर येथे लोकल, लांब पल्ल्याच्या गाडय़ांचा मोठा ताण आहे. या भागातून कोणतीही नवीन रेल्वेगाडी सुरू करणे शक्य नाही. त्यामुळे मध्य रेल्वेने परळ कारखान्यातील मशीन्स माटुंगा व इतरत्र पाठवून त्या जागेवर प्रवासी टर्मिनस उभारण्यात येणार आहे. तसेच कुर्ला ते सीएसएमटी पाचवी आणि सहावी मार्गिका तयार करण्याचा मार्ग खुला होणार आहे. त्यामुळे भविष्यात लोकल आणि लांब पल्ल्यांच्या गाडय़ा वाढवण्यावर भर दिला जाईल, असे मध्य रेल्वेचे विभागीय रेल्वे व्यवस्थापक रजनीश गोयल यांनी सांगितले.