पाळण्यातच चिमुरडीचा गळा आवळला, हत्येप्रकरणी आरोपी पित्याला अटक

चार महिन्यांपूर्वी शैला यांनी मुलीला जन्म दिला होता. तिचे नाव श्रेया ठेवण्यात आले होते. पण संजयला तिसरे अपत्य नको होते. त्यातून पती-पत्नीमध्ये वाद झाले होते. शैलाने शुक्रवारी रात्री श्रेयाला पाळण्यात झोपवले. शैलाने सकाळी पाहिले असता श्रेया हालचाल करत नव्हती. अखेर तिला तातडीने घाटकोपर येथील राजावाडी रुग्णालयात नेले असता तेथील डॉक्टरांनी तिला मृत घोषित केले. याप्रकरणी अपमृत्यूची नोंद करण्यात आली. त्यावेळी वैद्यकीय तपासणीत श्रेयाचा गळा आवळून तिला मारण्यात आल्याचे समजले. अखेर याबाबतची पोलिसांना माहिती मिळाली असता त्यांनी शैला यांच्या तक्रारीवरून गुन्हा दाखल केला.

चौकशीत आरोपी संजय कोकरे याची चौकशी केली असता त्यानेच मुलीला मारल्याचे मान्य केले. त्यानंतर त्याला याप्रकरणी पंतनगर पोलिसांनी अटक केली. आरोपी संजयला तिसरे अपत्य नको होते, त्यामुळे चार महिन्याची चिमुकली श्रेयाचा गळा आवळून तिला मारल्याचे त्याने सांगितले. याप्रकरणी पोलिसांनी शनिवारी संजयला अटक करून न्यायालयापुढे हजर केले असता न्यायालयाने त्याला पोलीस कोठडी सुनावली. आरोपीचा गुन्हेगारी इतिहास तपासला असता त्याच्याविरोधात यापूर्वी कोणताही गुन्हा दाखल नसल्याचे स्पष्ट झाले. याप्रकरणी पंतनगर पोलीस अधिक तपास करीत आहेत.