दुचाकीवरून येऊन धूमस्टाईलने सोन्याचा ऐवज लुटणाऱ्या १२ जणांना कल्याण पोलिसांनी अटक केली आहे. हे चोर कल्याण, डोंबिवली, भिवंडी, मुंब्रा, कळवा परिसरात चोऱ्या करीत होते. त्यांच्याकडून १३ लाख किंमतीचे ५० तोळे जप्त करण्यात आले आहे. या आरोपींनी २४ गुन्ह्य़ांची कबुली दिली आहे.
शहरांमध्ये हे बारा जण तीन टोळ्यांच्या माध्यमातून महिलांजवळील सोन्याचा ऐवज लुटत. सकाळी, संध्याकाळी हे गुन्हेगार दुचाकीवरून महिलांच्या गळ्यातील मंगळसूत्र, सोनसाखळी व इतर सोन्याचा ऐवज हिसकावून पळून जात असत. दोन ते तीन महिन्यापासून या टोळ्यांनी शहरांमध्ये हैदोस घातला होता. यामधील दोघे जण अल्पवयीन आहेत. त्यांच्याकडून मोटार सायकल जप्त करण्यात आल्या आहेत.