आयपीएलमधील सट्टेबाजीच्या रॅकेटप्रकरणी अटकेत असलेला चेन्नई सुपर किंग्जचा मालक गुरुनाथ मयप्पन, अभिनेता विंदू दारा सिंग यांच्यासह अल्पेशकुमार पटेल आणि प्रेम तनेजा यांच्या पोलिस कोठडीत शुक्रवारी तीन दिवसांची वाढ करण्यात आली. अतिरिक्त महानगरदंडाधिकारी ए. ए. खान यांनी या दोघांची पोलिस कोठडी ३ जूनपर्यंत वाढविण्याचे आदेश दिले. 
आयपीएलमधील सट्टेबाजीप्रकरणी देशातून फरार झालेल्या सट्टेबाजांशी या दोघांचे आणखी काय काय संबंध होते, हे शोधून काढायचे असल्याने या दोघांच्या पोलिस कोठडीत सरकारी वकिलांनी वाढ करण्याची मागणी केली. बचाव पक्षाच्या वकिलांनी पोलिस कोठडी वाढविण्याला विरोध केला. या दोघांवर ज्या कलमांतर्गत गुन्हा दाखल करण्यात आलाय, ती जामीनपात्र आहेत. तसेच त्यांनी बराचवेळ पोलिस कोठडीत घालवला आहे, असा युक्तिवाद बचाव पक्षाच्या वकिलांनी केला. महानगरदंडाधिकाऱयांनी दोन्ही बाजू ऐकून घेतल्यावर पोलिस कोठडीत वाढ करण्याचा निर्णय घेतला.