लोकसत्ता प्रतिनिधी
मुंबई : मुंबई पोलीस भरतीत दोन पदांसाठीची लेखी परीक्षा एकाच दिवशी होत असून उमेदवारांना दूरची केंद्रे आली आहेत. मुंबईच्या एका टोकापासून दुसऱ्या टोकाला अवघ्या अर्ध्यातासांत कसे पोहोचायचे असा पेच उमेदवारांसमोर उभा राहिला आहे.
मुंबई पोलिस भरतीत शारीरिक चाचणीत उत्तीर्ण झालेल्या उमेदवारांची लेखी परीक्षा ११ व १२ जानेवारी रोजी होणार आहे. पोलीस शिपाई, कारागृह शिपाई, पोलीस शिपाई ड्रायव्हर या तीन पदांसाठी परीक्षा होणार आहे. त्यातील कारागृह शिपाई, पोलीस शिपाई ड्रायव्हर या पदांची परीक्षा ११ जानेवारी रोजी आहे तर पोलीस शिपाई या पदासाठीची परीक्षा १२ जानेवारी रोजी होणार आहे. बहुतेक उमेदवार तिनही पदांसाठी अर्ज भरतात. मात्र ११ जानेवारी रोजी होणाऱ्या दोन्ही परीक्षासाठी उमेदवारांना दूरची परीक्षा केंद्रे मिळाली आहेत. नियमानुसार परीक्षा सुरु होण्यापूर्वी दोन तास परीक्षा केंद्रावर पोहोचणे अनिवार्य आहे. सकाळी १०.३० ते १२ आणि दुपारी २.३० ते ४ या कालावधीत परीक्षा होणार आहे. त्यामुळे १२ वाजता पहिली परीक्षा संपताच दुसरी परीक्षा सुरु होण्यापूर्वी २ तास म्हणजेच १२.३० वाजता अन्य परीक्षा केंद्रावर पोहोचावे लागणार आहे. एक परीक्षा देऊन दुसरे परीक्षा केंद्र गाठण्यासाठी उमेदवारांना जेमतेम अर्ध्यातासाचा कालावधी मिळणार आहे. मुंबईत त्याच उपनगरांतील केंद्र असले तरी वाहतूक, गर्दी लक्षात घेता अर्ध्यातासात पोहोचणे आव्हानात्मक आहे.
आणखी वाचा-दाभोलकर हत्या प्रकरण : आरोपींच्या सुटकेविरोधातील दाभोलकर कुटुंबीयांच्या अपिलाला आक्षेप
एका उमेदवाराला पहिल्या परीक्षेसाठी विक्रोळी येथील केंद्र मिळाले आहे तर दुसऱ्या परीक्षेसाठी मालाड येथील केंद्र आहे. रेल्वे, बस अशा कोणत्याही माध्यमातून दुसऱ्या परीक्षेचे केंद्र गाठण्यासाठी तासापेक्षाही अधिक कालावधी लागतो. असे असताना, दोन टोकाच्या उपनगरांमधील केंद्रात अर्ध्यातासात कसे पोहोचायचे असा प्रश्न उमेदवारांना पडला आहे. परीक्षासाठी येणारे अनेक उमेदवार ग्रामिण भागांतील आहेत. काही पहिल्यांदाच मुंबईत येणार आहेत. मुंबईतील रहदारी अंगवळणी नसलेल्या उमेदवारांनी केंद्रावर अत्यल्प वेळात कसे पोहोचायचे असा प्रश्न उमेदवारांनी उपस्थित केला आहे. त्यामुळे परीक्षेच्या वेळापत्रकात बदल करून वेगवेगळ्या दिवशी परीक्षा घ्याव्यात, अशी मागणी उमेदवारांकडून केली जात आहे. पोलिस भरतीची संधी वारंवार मिळत नाही. त्यामुळे एकापेक्षा अनेक पदांसाठी उमेदवार अर्ज करतात. त्यातच शारीरिक चाचणीचा टप्पाही पार केला आहे. मात्र, आता एका पदाची परीक्षा गमावण्याची वेळ येणार आहे, असे एका उमेदवाराने सांगितले.
