मुंबई : मुंबईतील सोमय्या शाळेच्या मुख्याध्यापिका परवीन शेख यांनी पॅलेस्टाईन आणि हमास यांच्याबद्दल सहानुभूती दाखवणाऱ्या व समर्थनार्थ आशय असलेल्या पोस्टवर लाईक आणि कमेंट करीत आपली मते मांडली होती. यानंतर सोमय्या शाळेच्या व्यवस्थापनाकडून मुख्याध्यापिका परवीन शेख यांना राजीनामा देण्यास सांगितल्याचा प्रकार समोर आला होता. आता सोमय्या शाळेच्या व्यवस्थापनाकडून मुख्याध्यापिका परवीन शेख यांना लेखी खुलासा सादर करण्याचे आदेश देण्यात आले आहेत.
दरम्यान, ‘मुख्याध्यापिका परवीन शेख यांच्याबाबत सोमय्या शाळा व्यवस्थापनाकडून चौकशीची प्रक्रिया सुरु आहे. या प्रकरणाबाबत आता परवीन शेख यांना लेखी खुलासा सादर करण्यास सांगितले आहे. आम्ही त्यांच्या उत्तराची वाट पाहत आहोत’, असे सोमय्या शाळेच्या व्यवस्थापनाकडून स्पष्ट करण्यात आले. सोमय्या शाळा व्यवस्थापनाच्या आदेशानुसार परवीन शेख या लेखी खुलासा सादर करीत आपली बाजू स्पष्ट करणार आहेत.
हेही वाचा – भाडेपट्ट्यात सवलत न दिल्याने म्हाडावासीयांवर आर्थिक बोजा!
परवीन शेख यांनी समाजमाध्यमावर पॅलेस्टाईन – इस्त्रायल संघर्षासंदर्भात पोस्ट करीत आपली मते मांडली होती. यासंदर्भातील वृत्त २४ एप्रिल रोजी एका संकेतस्थळावर प्रकाशित करण्यात आले. त्यानंतर शाळा व्यवस्थापनाने परवीन शेख यांना चौकशीसाठी बोलाविले. २६ एप्रिल रोजी झालेल्या बैठकीत शाळा व्यवस्थापनाने परवीन शेख यांना राजीनामा देण्यास सांगितले. त्यानंतरही काही दिवस त्यांनी काम करणे सुरू ठेवले. दरम्यान, परवीन शेख या आपल्या पदाचा राजीनामा न देण्यावर ठाम आहेत.
