दिवाळीनंतर डाळी, तसेच कडधान्यांचे दर कडाडले असून होळीपर्यंत डाळी, कडधान्याचे दर ‘जैसे थे’ राहणार असल्याचा दावा वाशीतील मुंबई कृषी उत्पन्न बाजार समितीमधील (एपीएमसी) घाऊक व्यापाऱ्यांनी केला आहे. सध्यस्थितीत कडधान्ये आणि डाळींचे दर शंभरीपार गेले आहेत. यामुळे डाळ, कडधान्ये विकत घेताना सर्वसामान्यांना हात आखडता घ्यावा लागत आहे. होळीनंतर बाजारात नवीन उत्पादन येण्यास सुरुवात होईल आणि त्याबरोबरच डाळी, कडधान्यांचे भाव कमी होतील, असे व्यापाऱ्यांचे म्हणणे आहे.
दिवाळीनंतर बाजारात नवीन पिकांचे उत्पादन येण्यास सुरुवात होते. यंदा मुंबई कृषी उत्पन्न बाजार समितीच्या घाऊक बाजारात दिवाळीनंतर तुलनेत डाळी, कडधान्यांची कमी आवक झाली आहे. किरकोळ बाजारात मागणी जास्त आणि पुरवठा कमी, अशी परिस्थिती निर्माण झाली आहे. यामुळे किरकोळ बाजारात कडधान्ये व डाळींचे दर कडाडले आहेत.
हेही वाचा – Video: “कशाला स्वत:ची अब्रू…”, ‘तो’ व्हिडीओ ट्वीट करत संजय राऊतांचा एकनाथ शिंदेंना टोला!
कडधान्यांपैकी एक असलेला वाल सध्या सर्वाधिक २०० रुपये प्रतिकिलो दराने विकला जात आहे. सहा महिन्यांपूर्वी त्याचा दर १५० रुपये प्रतिकिलो होता. आवक कमी झाल्यामुळे काही व्यापाऱ्यांकडे पांढरे वाल उपलब्ध नाहीत. दहा ते पंधरा दिवसांत गुजरात, मध्य प्रदेश आणि अलिबाग येथून वालाची आवक सुरू झाल्यानंतर त्याचे दर कमी होतील, असा अंदाज व्यापाऱ्यांनी व्यक्त केला.
कडधान्ये प्रतिकिलो (रुपये)
मटकी – ९० ते ११० रुपये
काबोली चणा – १२० ते १५६ रुपये
वाल – १८० ते २०० रुपये
चवळी मोठी – १०५ ते १३० रुपये
चवळी लहान – १५६ ते १६० रुपये
मूग – १०४ ते १२० रुपये
डाळी प्रतिकिलो (रुपये)
उडीद डाळ – १०४ ते १२० रुपये
मूगडाळ – १०२ ते १२० रुपये
तूरडाळ – १०० ते १२५ रुपये
ऑनलाइन किराणाविषयक ॲपवरही डाळी, कडधान्ये महागली
ऑनलाइन किराणाविषयक ॲपवर उपलब्ध असणाऱ्या डाळी, कडधान्यांचे दर बाजारातील दरापेक्षा अधिक आहेत. ऑनलाइन किराणाविषयक ॲप सोयीस्कर असले तरी बाजार आणि ॲपवरील डाळी, कडधान्यांच्या दरात तफावत असल्याचे निदर्शनास आले.
प्रतिक्रिया
बाजारात नवीन आवक सुरू होईपर्यंत आताचे दर असेच राहणार आहेत. नवीन उत्पादन येण्यास सुरुवात झाली की, आपोआप दर कमी होतील. होळीनंतर बाजारात नवीन उत्पादनाची आवक सुरू होईल, असे व्यापारी गजानन मेहतर म्हणाले.
